Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 378 Hüküm no: 352 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun bt. el-Hâc Hasan’ın cariyesi Timurhan bt. Abdullah’ı azat ettiği Mahmiye-i İstanbul’da Hadîce Sultân Mahallesi’nde sâkine Sâliha Hatun bt. el-Hâc Hasan tarafından ıtk-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iye ile ârifân Receb Beşe b. Ahmed ve el-Hâc Mahmud b. el-Hâc Bayram nâm kimesneler şehâdetleriyle şer‘an sâbit ve zâhir olan zevci Mehmed Efendi b. Muharrem nâm kimesne meclis-i şer‘-i şerîf-i enver ve mahfil-i dîn-i münîf-i ezherde bi’l-vekâle ikrâr ve takrîr-i kelâm edip müvekkilem mezbûre Sâliha Hatun kendüye rıkkını mu‘terife olan orta boylu çatık kaşlı kara elâ gözlü Gürciyyetü’l-asl işbu râfi‘atü’l-kitâb Timurhan bt. Abdullah nâm câriye-i memlûkesini hasbeten lillâhi te‘âlâ ve haseneten li-rûhi Resûlihi’l-mu‘allâ mâlından tahrîr ve i‘tâk ve sâir harâir-i asliyât silkine idrâc ve ilhâk eyledi ba‘de’l-yevm mevsûfe-i mezkûre Timurhan sâir harâir-i asliyât gibi hürre olup üzerinde velâdan gayrı hakkı kalmadı dedikde mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-şehri Rebî‘i’l-âhir li-sene ihdâ ve tis‘în ve elf. Şuhûdü’l-hâl: Mehmed Çelebi b. Mehmed, Osman Çelebi b. Muharrem, Hasan Beşe b. Mehmed, Yazıcı Süleyman Beşe b. Abdullah, Mehmed Çelebi b. Haydar, Hasan Efendi b. el-imâm, Abdurrahman Efendi el-Kādî.