Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 379 Hüküm no: 354 Orijinal metin no: [78b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Osman’ın vefat eden kızkardeşinin terekesinden kendisine isabet eden kısmı merhûmenin kocası Mustafa Çelebi’den teslim aldığını ikrar ettiği Medîne-i Hazret-i Ebî Eyyûbi’l-Ensârî -radıye anhü’l-Bârî- mahallâtından Fethi Çelebi Mahallesi’nde sâkine iken bundan akdem vefât eden Havva bt. Osman nâm hatunun verâseti zevci Mustafa Çelebi b. Abdullah ile li-ebeveyn er karındaşı Ahmed’e münhasıra olduğu şer‘an zâhir ve müte‘ayyin oldukdan sonra mezbûr Ahmed meclis-i şer‘-i şerîf-i enverde ve mahfil-i dîn-i münîf-i ezherde işbu râfi‘u’l-kitâb mezbûr Mustafa Çelebi mahzarında ikrâr ve takrîr-i kelâm edip müteveffât-ı mezbûrenin nukūd-ı terekesinden bana isâbet ve intikāl eden otuz esedî guruş ile sâir eşyâsından dahi hissem olan bir beledî döşek ve iki yorgan ve üç yasdık ve bir minder ve üç minder çârşebi ve bir döşek çârşebi ve altı sanduğı dahi mezbûr Mustafa Çelebi yedinden tamamen alıp kabz edip min-ba‘d kız karındaşım mezbûre Havva’nın mehrine ve sâir terekesine müte‘allika âmme-i de‘âvî ve mutâlebâtdan mezbûr Mustafa Çelebi’nin zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ min-Rebî‘i’l-âhir li-sene ihdâ ve tis‘în ve elf. Şuhûdü’l-hâl: İmâm Mehmed Efendi b. İbrahim, Müezzin Ahmed Çelebi b. Receb, Mustafa Beşe b. Ahmed, Mehmed Bey b. Abdullah, Mehmed Çelebi b. Hasan, Hüseyin b. Ali.