Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 380 Hüküm no: 355 Orijinal metin no: [78b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüb b. Mustafa’nın Halil Efendi b. Mehmed’de alacağı kalmadığını beyan ettiği Mahmiye-i İstanbul’da Şehzâde Sultân Mehmed Han Câmi‘-i Şerîfi kurbünde sâkin Eyüb b. Mustafa nâm kimesne meclis-i şer‘-i şerîf-i enverde sâbıkā medîne-i Sofya kādısı olan umdetü’l-mevâli’l-izâm Halil Efendi b. Mehmed mahzarında ikrâr-ı tâm ve takrîr-i kelâm edip bundan akdem mûmâ-ileyh Halil Efendi medîne-i Sofya kādısı iken mûmâ-ileyh Halil Efendi’ye bir husûs için bi-tarîkı’r-rüşve yetmiş iki esedî guruş ile bir rub‘ guruş vermiş iken benden bir def‘a yüz esedî guruş ve bir def‘a dahi seksen esedî guruş ve kısmet nâmıyla dahi altmış iki buçuk esedî guruş ve beynimizde ma‘lûm bir hüccet harcı için kırk esedî guruş ve keyli beynimizde ma‘lûm altmış esedî guruş kıymetli arpamı ahz ü kabz etmişidin deyü mûmâ-ileyh Halil Efendi’den cem‘an üç yüz kırk iki buçuk esedî guruş da‘vâ ve taleb etmişidim lâkin ber-vech-i muharrer medfû‘um olan meblağ-ı mezbûr yetmiş iki esedî guruş ile bir rub‘ guruşdan ziyâde iki yüz yetmiş esedî guruş ile bir rub‘ guruş da‘vâmın beyyinesi olmamağın hâlâ meblağ-ı mezbûr yetmiş iki esedî guruş ile bir rub‘ guruşun mukaddemâ otuz beş esedî guruşunu ve hâlâ otuz yedi esedî guruş ile bir rub‘ guruşunu mûmâ-ileyh Halil Efendi yedinden tamamen ahz ü kabz eyledim fîmâ-ba‘d mûmâ-ileyh Halil Efendi ile vechen mine’l-vücûh da‘vâ ve asla hakkım yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin ve’l-işrîn min-şehri Rebî‘i’l-evvel li-sene ihdâ ve tis‘în ve elf. Şuhûdü’l-hâl: (...) (...) Himmet (...) (...) (...), Mehmed Keresteci, Mehmed Çelebi b. Süleyman, Ali Hoca (...), Mehmed Çelebi b. Haydar.