Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 380 Hüküm no: 356 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Siyavuş Ağa b. Abdullah’ın evini Mismârî el-Hâc Hasan vakfının mütevellisine bey‘ bi’l-istiğlâl yoluyla sattığı Mahmiye-i İstanbul’da Monla Aşkī Mahallesi’nde sâkin Siyavuş Ağa b. Abdullah meclis-i şer‘-i şerîfde Mismârî el-Hâc Hasan vakfına bi’l-fi‘il mütevellî olan işbu bâ‘isü’l-kitâb Ahmed Efendi b. Abdurrahman mahzarında ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan ba‘zan Mehmed Çelebi menzili ve ba‘zan Haremeyn-i Şerîfeyn vakfı olan menzil ve bir tarafdan ba‘zan Hüseyin Çelebi vakfı ve ba‘zan Dülger Yunus vakfı olan menziller ve bir tarafdan el-Hâc İlyas Mahallesi’nde imâm ve müezzin olanlara meşrûta vakıf menzil ve bir tarafdan tarîk-ı âm ile mahdûd büyût-ı adîdeyi müştemil bir bâb mülk menzilimi cemî‘ tevâbi‘ ve levâhıkıyla mütevellî-i mezbûr Ahmed Efendi’ye altı yüz elli kıt‘a esedî guruşa bi-tarîkı’l-istiğlâl bey‘ ve teslîm ol dahi mal-ı vakf-ı mezbûr ile ber-vech-i mübeyyen iştirâ ve kabûl ve tesellüm eylediğinden sonra semeni olan meblağ-ı mezbûr altı yüz elli kıt‘a esedî guruşu mütevellî-i mezbûr yedinden bi’t-tamam ahz ü kabz edip yine mütevellî-i mezbûr Ahmed Efendi menzil-i mahdûd-ı mezkûru ba‘de’t-tahliyeti’ş-şer‘î ve’t-takābuzı’l-mer‘î târih-i kitâbdan beher sene doksan yedi buçuk guruşdan üç sene tamamına değin iki yüz doksan iki buçuk guruşa bana îcâr ve teslîm ben-dahi minvâl-i meşrûh üzre istîcâr ve kabz ve tesellüm eyledim dedikde gıbbe’t-tasdîkı’ş-şer‘î menzil-i mahdûd-ı mezkûrun derkine ve şer‘an lâzım gelen ücretine mârrü’z-zikr el-Hâc İlyas Mahallesi’nde sâkin el-Hâc Mahmud Çelebi b. Şa‘ban tarafeynden emir ve kabûlü hâviye kefâlet-i sahîha-i şer‘iye ile kefîl olmağın mâ-vaka‘a bi’t-taleb ketb olundu. Fi’t-tâsi‘ min-Rebî‘ülâhir sene [10]91. Şuhûdü’l-hâl: Mehmed Efendi b. Şeyh Osman Efendi el-imâm, Hüseyin Çelebi b. Hasan, Mehmed Efendi el-kayyûm, Mehmed Çelebi b. Receb, Mehmed Çelebi b. Şeyh Mehmed Kâtib-i Vakıf, Mehmed Çelebi b. Ahmed, Ali Dede b. Ahmed el-müezzin.