Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 381 Hüküm no: 357 Orijinal metin no: [79a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manol v. Yasef’in Süleyman Bey b. Ramazan’a ait cariyeyi onun izniyle Haseki Ali Ağa’ya teslim ettiği Medîne-i Hazret-i Ebî Eyyûb-i Ensârî -aleyhi’r-rahmeti’l-Bârî- muzâfâtından kasaba-i Hasköy’de Kiremitçi Ahmed Çelebi Mahallesi’nde sâkin Aragon cemâ‘atinden Manol v. Yasef nâm Yahûdî meclis-i şer‘-i şerîf-i enverde işbu bâ‘isü’l-kitâb Süleyman Bey b. Ramazan nâm kimesne mahzarında ikrâr-ı tâm ve takrîr-i kelâm edip mezbûr Süleyman Bey bundan akdem açık kaşlı elâ gözlü orta boylu Çerkesiyyetü’l-asl Ârife nâm bikr câriye-i memlûkesini bana ve zevcem İsterola nâm Yahûdiye’ye …? ta‘allümü için def‘ ü teslîm eylediğinden sonra ben câriye-i mevsûfe-i mezbûreyi mezbûr Süleyman Bey izniyle umdetü’l-a‘yân Haseki Ali Ağa’ya alâ-sevmi’ş-şirâ teslîm mezbûr Haseki Ali Ağa dahi kabz ve tesellüm edip hâlâ mevsûfe-i mezbûre müşârün-ileyh Haseki Ali Ağa yedindedir dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Rebî‘i’l-evvel li-sene ihdâ ve tis‘în ve elf. Şuhûdü’l-hâl: Ali Ağa Sırmakeş Hüner b. ( ), Nâzır Ağa b. ( ), Mustafa Çelebi Yiğitbaşı, Sunullah Efendi el-kâtib, Ebûbekir Efendi el-kâtib.