Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 381 Hüküm no: 358 Orijinal metin no: [79a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çelebi’nin vefat eden annesinden kendisine intikal eden bahçedeki hisselerini babası Hamza Efendi b. Mehmed’e sattığı Mahmiye-i İstanbul’da Beyceğiz Mahallesi’nde sâkine iken bundan akdem vefât eden Sâliha bt. Halil nâm hatunun verâseti zevc-i metrûkü Hamza Efendi b. Mehmed ile sadrî kebîr oğlu Abdullah Çelebi’ye münhasıra olduğu şer‘an zâhir ve müte‘ayyin oldukdan sonra mezbûr Abdullah Çelebi meclis-i şer‘-i hatîr-i lâzımü’t-tevkīrde babası işbu sahibü’l-kitâb mezkûr Hamza Efendi mahzarında ikrâr ve takrîr-i kelâm edip vâlidem müteveffât-ı mezbûrenin terekesinden olup mahmiye-i mezbûrede Nişancı Cafer Mahallesi’nde vâki‘ bir tarafdan Ramazan Çelebi vakfı odalar ve bir tarafdan Ekmekçioğlu tasarrufunda olan bahçe ve bir tarafdan tarîk-ı hâs ve bir tarafdan tarîk-ı âm ile mahdûde bir kıt‘a mülk bahçe dör[t] sehim i‘tibâr olunup sihâm-ı mezbûreden bi’l-irsi’ş-şer‘î bana isâbet ve intikāl eden üç sehim hisse-i şâyi‘amı babam mezbûra üç yüz kıt‘a esedî guruşa tarafeynden îcâb ve kabûlü hâvî bey‘-ı kat‘î ile bey‘ ve teslîm ol dahi iştirâ ve kabûl eylediğinden sonra semeni olan meblağ-ı mezbûr üç yüz esedî guruşu yedinden tamamen ahz ü kabz eyledim ba‘de’l-yevm bahçe-i mezbûre ırsen ve şirâen babam mezkûr Hamza Efendi’nin mülkü ve hakk-ı sırfıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin min-Rebî‘i’l-âhir li-sene ihdâ ve tis‘în ve elf. Şuhûdü’l-hâl: Fahrü’l-kuzât Derviş Mehmed Efendi b. Osman Efendi, Hasan Bey b. Ömer, Yahya Bey b. Hasan, Ahmed Çelebi b. Hüseyin, Ömer Bey b. Hasan, Abdurrahman Çelebi b. Derviş Mehmed, Hasan Efendi b. el-imâm, Mustafa Çelebi b. Mehmed el-imâm bi-Câmi‘-i Mehmed Ağa, Ömer Efendi b. Muslı el-imâm bi-Câmi‘-i Nişancı Mehmed Paşa, Mehmed b. Abdullah, Mehmed Çelebi b. Haydar, Ahmed b. Piyale.