Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 383 Hüküm no: 360 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şa‘ban Beşe’nin, vefat eden kardeşi İbrahim Efendi b. Hızır’ın satılan eşyalarından kendi hissesine düşen mikdarı Abdülfettah Ağa b. Ramazan’dan teslim aldığı Vilâyet-i Rumeli’nde Kavak kazâsına ber-vech-i te’bîd mutasarrıf iken kazâ-i mezbûrda vefât eden İbrahim Efendi b. Hızır’ın verâseti zevce-i metrûkesi Meryem bt. Abdullah ile li-ebeveyn er karındaşı Şa‘ban Beşe nâm kimesneye münhasıra olduğu şer‘an sâbit ve zâhir oldukdan sonra mezbûr Şa‘ban Beşe meclis-i şer‘-i hatîr-i lâzımü’t-tevkīrde hâlâ İnöz ve Kavak memlahası emîni olan Dimitraki v. Asanya nâm zimmî tarafından zikrolunan Kavak kazâsı memlahasında vekîl olan işbu bâ‘isü’l-kitâb Abdülfettah Ağa b. Ramazan nâm kimesne mahzarında ikrâr ve takrîr-i kelâm edip mûrisim müteveffâ-yı mezbûr İbrahim Efendi ber-vech-i muharrer kazâ-i mezbûra ber-vech-i te’bîd mutasarrıf iken kazâ-i mezbûrda vefât eyledikde yanında mevcûd olan eşyâsını kassâm ma‘rifetiyle sûk-ı sultânîde bey‘ ve semenini bi’l-emâne mezbûr Abdülfettah Ağa ahz ü kabz etmekle ber-mûceb-i defter-i kassâm mezbûr Abdülfettah Ağa’nın makbûzundan benim hisse-i şer‘iyeme ancak beş bin dokuz yüz elli akçe isâbet ve intikāl etmekle ber-vech-i muharrer mezbûr Abdülfettah Ağa’nın ber-mûceb-i defter-i kassâm makbûzu olan meblağ-ı mezbûr beş bin dokuz yüz elli akçe hissemin dört bin üç yüz akçesini bi’t-tamam ve’l-kemâl mezbûr Abdülfettah Ağa’nın yedinden alıp kabz eylediğimden sonra meblağ-ı bâkīye müte‘allika âmme-i de‘âvî [ve] mutâlebâtdan mezbûr Abdülfettah Ağa’nın zimmetini ibrâ-yı âmm-ı kātı‘u’l-hisâm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min- Rebî‘i’l-âhir li-sene ihdâ ve tis‘în ve elf. Şuhûdü’l-hâl: Salih Bey b. İsmail, Yusuf Bey b. Hasan tâbi‘-i mezbûr, el-Hâc Mustafa b. Yusuf Efendi, İsmail Çelebi b. Şa‘ban, Mehmed Çelebi b. Haydar.