Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 383 Hüküm no: 361 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çoban Nikola v. Anderya’nın Mehmed b. Bali tarafından gasp edilen koyunlarını tamamen geri aldığını beyan ettiği Havâss-ı Refî‘a kazâsı muzâfâtından Hasköy’de sâkin Çoban Nikola v. Anderya nâm zimmî meclis-i şer‘-i hatîrde medîne-i Ebî Eyyûb-i Ensârî -radıye anhü Rabbühü’l-Bârî-de Nazperver Mahallesi sükkânından işbu bâ‘isü’l-kitâb el-Hâc Mehmed b. Bali mahzarında ikrâr ve takrîr-i kelâm edip mezbûr el-Hâc Mehmed târih-i kitâbdan dört buçuk ay mukaddem çobanlıkda ecîrim olan Astani nâm zimmî yedinde Baba Nakkāş nâm karyede kışlakda ekseri gebe iki yüz on sekiz re’s sağılır koyunlarımı bi-gayr-ı hakkın ahz ve gasb etdiğinden sonra mârrü’z-zikr koyunlarımın elli dört re’sini gāib ani’l-meclis Bıyıklı Yani nâm zimmî yedinde bulup bi’l-istihkāk ahz ü kabz edip mâ‘adâ yüz altmış dört re’s koyunlarımı bundan akdem hâkim-i muvakki‘-i sadr-ı kitâb huzûrunda mezbûr el-Hâc Mehmed’den taleb ve da‘vâ ve muvâcehesinde şühûd-ı udûl ile ba‘de’l-isbât zikri mürûr eden yüz altmış dört re’s koyunlarımı bana teslîme mezbûr el-Hâc Mehmed’e tenbîh olundukdan sonra mârrü’z-zikr yüz altmış dört [re’s] koyunlarımın yüz re’sini işbu hazır bi’l-meclis Anderya v. Yani nâm zimmî yedinde bulup bi’l-istihkāk ve’l-isbât ahz ü kabz eylediğimden mâ‘adâ hâlâ bâkī altmış dört re’s koyunlarımı dahi mezbûr el-Hâc Mehmed yedinden bi’t-tamam ahz ve tesellüm ve kabz eyleyip zikrolunan iki yüz on sekiz re’s koyunlara ve kuzularına müte‘allika cemî‘ de‘âvî ve mutâlebâtdan mezbûr el-Hâc Mehmed’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâdî aşer min-şehri Rebî‘i’l-âhir li-sene ihdâ ve tis‘în ve elf. Şuhûdü’l-hâl: İbrahim Ağa b. Süleyman el-Mübâşir, el-Hâc Süleyman Beşe b. Sinan Mumcu, Mehmed Efendi b. Yusuf İmâm, Şa‘ban Bey b. Hüseyin el-Bostânî, el-Hâc Hüseyin b. Ahmed, Berber Ahmed Ağa b. Abdullah.