Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 57 Hüküm no: 3 Orijinal metin no: [1b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhtesip İskender mahallesinden Mehmed b. Ahmed’in Ali b. Abdullah’ı vasi tayin etmesi Mahmiye-i İstanbul’da Muhtesip İskender mahâllesi sâkinlerinden el-Hâc Mehmed b. Ahmed nâm kimesne tarafından husûs-ı âti’l-beyana vekîl olduğu İbrahim b. Mustafa ve Mustafa bin Hüseyin nâm kimesneler şehâdetleriyle sâbit olan Mehmed Ağa b. Abdullah nâm kimesne mahmiye-i mezbûrede meclis-i şer‘de işbu râfi‘ü’l-vesîka el-Hâc Ali b. Abdullah nâm kimesne mahzarında bi’l-vekâle ikrâr ve takrîr-i kelâm edip müvekkilim mezbûr el-Hâc Ahmed [Mehmed] bi-emrillâhi te‘âlâ fevt olduğunda cemî‘ malının sülüsü ifrâz olunup techîz ve tekfîn ve sâir masârıf görüldükden sonra on guruş ıskāt-ı salâtına ve beş guruş mahâlle-i mezbûre imamı es-Seyyid Mustafa Efendi’ye ve iki buçuk guruş mahâlle-i mezbûre müezzini Mustafa Çelebi’ye verilip ve kırk guruş Kabakulak demekle ma‘rûf Ahmed Ağa Çeşmesi masârıfına vakf olup ve fazla kalırsa eyyâm-ı mu‘tâdede fukarâ-yı Müslimîne it‘âm-ı ta‘âm oluna ve sulbiye-i sagīre kızı Emine’nin rüşd[ü] bülûğuna değin tesviye-i umûrunu görmek üzere vesâyâ-yı mezkûresini tenfîzine mezbûr el-Hâc Ali’yi vasiyy-i muhtâr nasb u ihtiyâr eylediğinde ol dahi ber-vech-i muharrer vesâyet-i mezkûreyi kabûl ve hizmet-i lâzımesini mahâllinde edâya ta‘ahhüd ve iltizâm eyledi dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi 11 min-Muharremü’l-haram sene 1116 Şuhûdü’l-hâl: el-Hâc Yunus b. Osman, Mustafa Efendi b. el-Hâc, İbrahim Çelebi b. Mustafa, Ahmed Çelebi b. Musa, el-Hâc Dilaver b. Abdullah, Yunus Beşe b. Mehmed, Mustafa Çelebi b. Hüseyin.