Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 58 Hüküm no: 4 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia Hatun’un kardeşi Mustafa Çelebi’de olan alacağının tahsili Mahmiye-i İstanbul’da Debbâğ Yunus mahâllesinde sâkine Rabia bt. Kilitçi Ömer Çelebi nâm hatun zâtı ba‘de’t-ta‘rîfi’ş-şer‘î mahmiye-i mezbûrede meclis-i şer‘de li-ebeveyn karındaşı Mustafa Çelebi nâm kimesne mahzarında üzerine da‘vâ ve takrîr-i kelâm edip mezbûr Mustafa Çelebi zimmetinde cihet-i karz-ı şer‘îden yüz kırk guruş hakkım olmağla hâlâ taleb eylediğimde edâdan imtinâ‘ eder, suâl olunup alıverilmesi matlûbumdur dedikde, gıbbe’s-suâl mezbûr Mustafa Çelebi cevâbında fi’l-vâki‘ kız karındaşı müdde‘iye-i mezbûre Rabia zimmetinde cihet-i karz-ı şer‘îden yüzkırk guruş vâcibü’l-edâ deyni olduğunu ikrâr u i‘tirâf etmeğin mûcebiyle meblağ-ı mezbûr yüz kırk guruşu müdde‘iye-i mezbûre Rabia’ya edâ ve teslîme merkūm Mustafa Çelebi’ye tenbîh birle mâ-vaka‘a bi’t-taleb ketb olundu. Fi’l-yevmi’s-sâlis min-Zilka‘deti’ş-şerîfe li-sene hamse aşere ve mi’e ve elf. Şuhûdü’l-hâl: Ahmed Çelebi b. Mustafa, Ahmed Çelebi b. Ömer, Mehmed Çelebi b. Abdullah, Yusuf b. Abdullah.