Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 59 Hüküm no: 6 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Horoslu kazasından Hasan Bey’in Himmet Bey ile olan davasında sulh olması Vilâyet-i Anadolu’da Horoslu kazâsı ahâlîsinden olup mahmiye-i İstanbul’da müsâfiren sâkin Hasan Bey b. Yakub nâm kimesne mahmiye-i mezbûre[de] meclis-i şer‘de işbu râfi‘ü’l-vesîka Himmet Bey b. Ali mahzarında ikrâr ve takrîr-i kelâm edip târîh-i kitâbdan on ay mukaddem mezbûr Himmet Bey ve gāibûn ani’l-meclis Ali Bölükbaşı b. Ahmed ve Ali Beşe b. Ahmed ve Küçükoğlu Halil ve Küçük Mehmed ve İbrahim b. Ali ve Topal Ali ve Ahmed b. Ali ve Yusuf b. Abdullah nâm kimesneler mahrûse-i Edirne’de sâkin olduğum menzilimi basıp mahlût nakid doksan beş guruşum ile eşyâ-yı memlûkemden mecmû‘u üç yüz seksen altı guruş kıymetli bir mushaf-ı şerîf ve iki tensûh sarık ve üç aded çara sarık ve iki alaca kaftan ve dört aded beyaz sâde ve iki zıbun ve bir kebîr boğça ve bir peştemâl ve bir kırmızı sof çakşır ve bir çuka kontuş ve üç aded çividî sarık ve dört aded sırmalı makreme ve üç Bursa kesesi ve bir kırmızı kemer-bend kuşak ve bir sîm gaddâre ve bir eğer ma‘a bisât ve bir bakır raht ve bir çuka zilpûş ve bir kırmızı çuka yağmurluk ve iki sîm kamçı ve iki cam tas ve iki dülbend örtüsü ve bir boylu tüfenk ve iki tabancalı tüfenk ve bir keremsûd sincab beden kürkü ve bir anteri ve bir taraklı anteri [2b] ve bir neftî dolama ve bir müsta‘mel Selanik keçesi ve bir müsta‘mel Acem keçesi ve iki yorgan ve bir döşek ve iki kadife yasdık ve bir top cedîd mâ’î sof ve bir çuka çakşır ve bir köhne sarık ve bir sincap bogasiye kaplı beden kürk ve iki Yanbolu kebesi ve bir mâ’î tiftik kebe ve iki mâî şalvar ve bir çift yan hıştı? ve bir el hıştı? ve iki âbdest makremesi ve bir makreme kesesi ve bir âbdest ibriği ve bir çift gırâr ve iki cedîd çizme ve bir balık dişi çıngıraklı şatranc ve iki heybe ve bir müsta‘mel mâ’î yağmurluk ve iki re’s kır bargirimi fuzûlen ahz u gasb etmeleriyle ben dahi mezbûr Himmet Bey’den nakd-i meblağ-ı mezbûr doksan beş guruş eşyâ-yı mezkûremin aynları mevcûd ise aynların, müstehlek ise ba‘de’s-sübût kıymet-i şer‘iyyelerini taleb ve da‘vâ eylediğimde ol dahi inkâr etmekle ben dahi ber-vech-i muharrer müdde‘âmı isbât sadedinde iken beynimize muslihûn tavassut edip da‘vâ-i mezkûremden beni mezbûr Himmet Bey ile kırk guruş üzerine akd-i musâlaha eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru yedinden tamâmen ba‘de’l-ahz ve’l-kabz husûs-ı mezbûra müte‘allıka âmme-i da‘vâ ve mutâlebâtdan mezbûr Himmet Bey ile ve gāibûn-ı mezbûrûn [ile] vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 10 min-Muharrem sene 1116 Şuhûdü’l-hâl: Es-Seyyid Osman Ağa Şehsuva[r]zâde, Hüseyin Çavuş el-mübâşir, Mehmed Ağa b. Ahmed, Halid b. Mehmed, es-Seyyid Ali Çelebi b. ( ), Bâli Beşe b. ( ), el-Hâc Osman b. ( ).