Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 60 Hüküm no: 7 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Faik Mahmud Efendi’nin hürriyetini ispat eden cariyesinden dolayı Hatice bt. Hasan’da olan alacağını tahsil etmesi Anadolu kuzâtından olup mahmiye-i İstanbul’da Molla Aşkī mahâllesi ahâlîsinden Faik Mahmud Efendi b. Şeyh Ali nâm kimesne tarafından husûs-ı âti’l-beyana vekîl olduğu Ahmed b. Abdullah ve Murtaza Bey b. Abdurrahman nâm kimesneler şehâdetleriyle sâbit olan Ahmed Bey b. Mehmed nâm kimesne mahmiye-i mezbûrede meclis-i şer‘-i hatîr-i lâzımü’t-tevkīrde Hadîce bt. Hasan nâm hatun mahzarında bi’l-vekâle üzerine da‘vâ ve takrîr-i kelâm edip mezbûre Hadîce Hatun bundan akdem yedinde mülkü ve hakkı olmak üzere işbu hâzıra bi’l-meclis orta boylu çatık sarı kaşlı gök elâ gözlü Emine bt. el-Hâc Yahya nâm hatunu câriye-i memlûkesi olmak zu‘muyla müvekkil-i mezbûr Faik Mahmud Efendi’ye iki yüz guruş semen-i makbûza bey‘ ü teslîm ol dahi iştirâ ve tesellüm edip yedinde iken mezbûre Emine Hatun da‘vâ-i hürriyet edip ben mahmiye-i mezbûrede Kumkapı kurbünde Nişâncı mahâllesi ahâlîsinden olup hâlâ Mısr-ı Kāhire’de sâkin hürrü’l-asl olan mezbûr el-Hâc Yahya’nın firâşından hâsıl ve hürretü’l-asl olan zevce-i menkûhası Âişe nâm hatundan mütevellide hürretü’l-aslım deyü mezbûre Hadîce Hatun meclis-i şer‘de hâzıra olduğu hâlde benden da‘vâ ve ben dahi hürriyetini inkâr edicek mezbûre Emine Hatun ber-vech-i muharrer müdde‘âsını mahmiye-i mezbûrede Hoca Rüstem mahâllesinde sâkin olup mezbûre Emine’nin zâtını ma‘rifet-i şer‘iyye ile ârifân olan Hasan b. Mehmed ve Ali b. Osman nâm kimesneler şehâdetleriyle hâkim-i muvakkı‘-ı sadr-ı kitâb huzûrunda mezbûre Hadîce ile benim muvâcehemde vech-i şer‘î üzere isbât edip hürriyetine hükm ve sebîli tahliye olunmağın mezbûre Hadîce Hatun’a suâl olunup merkūme için müvekkil-i mezbûrdan semen deyü makbûzu olan meblağ-ı mezbûr iki yüz guruşu bi’l-vekâle bana redd ü teslîm etmek üzere tenbîh olunmak matlûbumdur dedikde gıbbe’s-suâl mezbûre Hadîce Hatun cevâbında fi’l-hakīka müvekkil-i mezbûra iki yüz guruşa câriye-i memlûke olmak üzere bey‘ ve kabz-ı semen eylediğini mezbûre Emine Hatun bâlâda tafsîl ü beyan olunduğu üzere hürretü’l-asl olduğunu müdde‘î-i mezbûr ile kendi muvâcehelerinde vech-i şer‘î üzere isbât olunup hürriyetine hükm olunan mezbûre Emine Hatun müvekkil-i mezbûra câriyesi olmak üzere iki yüz guruşa bey‘ ve kabz-ı semen eylediği bi-aynihâ mezbûre Emine olduğunu ikrâr u i‘tirâf etmeğin ikrârı mûcebince mezbûre Emine için semen nâmına müvekkil-i mezbûrdan makbûzu olan meblağ-ı mezbûr iki yüz guruşu vekîl-i mezbûra redd ü teslîme mezbûre Hadîce Hatun’a tenbîh birle mâ-vaka‘a bi’t-taleb ketb olundu. Fi’l-yevmi’l-âşir min-Muharremü’l-haram li-sene sitte aşer ve mi’ete ve elf. Şuhûdü’l-hâl: İsmail Efendi b. el-Hâc Siyavuş, Ömer Efendi el-kādı, Veliyüddin Efendi el-kādı, el-Hâc Mehmed Efendi el-kādı, el-Hâc Yusuf b. Osman.