Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 61 Hüküm no: 8 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cezayirli İsmail Beşe’nin kölesinin kaçmasına yardım eden Anastaş’ın köleyi bulması veya bedelini ödemesi Mahmiye-i İstanbul’da Bodrum Hanı’nda müsâferet vechi üzere sâkin işbu bâ‘isü’l-kitâb Cezâyirli İsmail Beşe b. Maden nâm kimesne mahmiye-i mezbûre meclis-i şer‘de Anastaş v. Mihal nâm zimmî muvâcehesinde üzerine da‘vâ ve takrîr-i kelâm edip mezbûr Anastaş’ın odası zikr olunan handa benim sâkin olduğum odaya muttasıl olmağla yedimde mülküm ve hakkım olup orta boylu, karagözlü kara kaşlı kara yağız iki yüz yirmi guruş kıymetli Beşgevan nâm acemi Efrenciyyü’l-asl abd-i memlûkümü târîh-i kitâbdan yirmi yedi gün mukaddem mezbûr Anastaş odamdan ayardıp kaçırmakla mezbûr Anastaş’dan zikr olunan abd-i memlûkü taleb eylediğimde zikr olunan abd-i memlûkümün beş guruşunu alıp ayardıp kaçırdığını şuhûd mahzarında ikrâr dahi etmişdir. Hâlâ mezbûr Anastaş’a suâl olunup mûceb-i şer‘î icrâ olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda udûl-i Müslimînden olup zikr olunan Bodrum Hanı’nın Hancısı Ahmed Bey b. İbrahim ve han-ı mezbûrda sâkin Süleyman Çelebi b. Abdullah ve Ahmed Çelebi b. Ramazan nâm kimesnelere li-ecli’ş-şehâde meclis-i şer‘e hâzirûn olup istişhâd olunduklarında fi’l-hakīka işbu mezbûr Anastaş müdde‘î-i mezbûrun yedinde mülk ve hakkı olan mevsûf-ı mezbûr Beşgevan nâm Efrenciyyü’l-asl acemi abd-i memlûkünün beş guruşun alıp kaçırdım deyü han-ı mezkûrda bizim huzûrumuzda ikrâr etmekle biz bu <> bu vech- üzere <<şâhidleriz şehâdet dahi ederiz deyü her biri>> mezbûr Anastaş müdde‘î-i mezbûrun abd-i memlûkü olan mezbûr Beşgevan’ı ayardıp kaçırdığını ikrâr eylediğine ve mevsûf-ı mezbûrun kıymeti dahi iki yüz yirmi guruş olduğuna şâhidleriz şehâdet dahi ederiz deyü her biri mezbûr Anastaş muvâcehesinde edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle mevsûf-ı mezbûru bulup bi-aynihî teslîme yâhud kıymeti olan meblağ-ı mezbûr iki yüz yirmi guruşu bi-tarîkı’d-damân müdde‘î-i mezbûra edâya mezbûr Anastaş’a tenbîh birle mâ-vaka‘a bi’t-taleb ketb olundu. Fi’l-yevmi’l-âşir min-Muharremü’l-haram li-sene sitte aşere ve mi’e ve elf. Şuhûdü’l-hâl: Hüseyin Efendi el-kādı, İsmail Efendi el-kâtib, Mehmed Efendi el-kādı, Veliyüddin Efendi el-kâtib, Ömer Efendi el-kādı, el-Hâc Yusuf b. Osman