Bab Mahkemesi 54 Numaralı Sicil (H. 1102 / M. 1691) cilt: 20, sayfa: 342 Hüküm no: 413 Orijinal metin no: [71b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mustafa’nın Mehmed Beşe b. Hasan’dan muhâlaa yoluyla boşanması Mahmiye-i İstanbul’da Çerağî mahallesi sâkinelerinden Fâtıma bt. Mustafa nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde, zevc-i dâhili işbu râfi‘ü’l-kitâb Mehmed Beşe b. Hasan nâm kimesne ikrâr-ı tâm ve takrîr-i kelâm edip, zevcim merkūm Mehmed Beşe zimmetinde mütekarrir ve ma‘kūdun-aleyh olan iki bin yüz akçe mehr-i müeccelim ve nafaka-i iddet-i mu‘ayyene-i ma‘lûmem ve me’ûnet-i süknâm dahi kendi üzerime olmak üzre zevcim merkūm Mehmed Beşe ile muhâla‘a-i sahîha-i şer‘iyye ile muhâla‘a edip, ol dahi ber vech-i muharrer hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâ ve münâza‘ât ve eymân ve muhâsamâtdan her birimiz âharın zimmetini ibrâ-i âm ile ibrâ ve iskāt eyledik dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Cumâdelâhire sene 1102. Şuhûdü’l-hâl: Nuh Efendi b. Hasan, Abdullah Efendi b. ( ), es-Seyyid Ahmed b. ( ), İbrahim Çelebi [b.] Ahmed, Hasan Efendi el-kâtib.