Bab Mahkemesi 54 Numaralı Sicil (H. 1102 / M. 1691) cilt: 20, sayfa: 343 Hüküm no: 414 Orijinal metin no: [71b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahya Çelebi b. Musli’nin babasından intikal eden menzil, köşk ve arsalarını Hüseyin Ağa b. Hacı İlyas’a satması Vilâyet-i Anadolu’da medîne-i Bolu mahallâtından Gölyüzü mahallesinden olup, hâlâ mahmiye-i İstanbul’da Âbid Çelebi mahallesinde sâkine iken bundan akdem fevt olan Musli Efendi b. Musa’nın sulbî kebîr oğlu ve hasran vârisi olan Yahya Çelebi meclis-i şer‘-i şerîf-i enverde, işbu râfi‘ü’l-kitâb Hüseyin Ağa b. el-Hâc İlyas mahzarında ikrâr-ı tâm ve takrîr-i kelâm edip, mahmiye-i mezbûrede Âbid Çelebi mahallesinde vâki‘ bir tarafdan ba‘zan Âbid Çelebi Mescidi duvarı ve bir tarafdan ba‘zan Hâce Hâtun tasarrufunda olan menzil ve bir tarafdan ba‘zan Afife Hâtun tarafında olan menzil ve bir tarafdan ba‘zan İbrahim ve Hüseyin nâm kimesnelerin ale’l-iştirâki’s-seviy tasarruflarında olan menzil ve bir tarafdan Câbî Ahmed tasarrufunda olan menzil ve ba‘zan Sahhâf Abdullah Çelebi menzili ve bir tarafdan tarîk-i âm ile mahdûd iki bâb fevkānî oda ve bir sofa ve dehliz ve iki bâb tahtânî oda ve bir matbah ve bir anbar ve bir ahır ve bi’r-i mâ’ ve eşcâr-ı müsmire ve gayr-ı müsmireli ve bir köşkü ve diğer bi’r-i mâyı ve kenîfi müştemil menzilin tûlen ve arzan bi hesâb-ı terbî‘î sekiz yüz iki buçuk zirâ‘ arsası merhûm Hüseyin Ağa Vakfı’ndan icâre-i mu‘accele beher yevm bir akçe ücret-i müeccele ile babam müteveffâ-yı mezbûrun ile’l-vefât taht-ı tasarrufunda ve üzerinde olan ebniyesi silk-i mülkünde münselik ve sokak kapısı tarafında vâki‘ bi hesâb-ı merkūm elli yedi buçuk zirâ‘ arsası ve üzerinde olan köşk ve bi’r-i mâ ebniyesi ve merhûm Âbid Çelebi Vakfı’ndan icâre-i mu‘accele beher mâh on beş akçe ücret-i müeccele ile kezâlik taht-ı tasarrufunda olup, ba‘de’l-vefât ebniye-i memlûke ve mezbûre irsen bana isâbet ve arsateyn-i mezbûreteyn ile köşk ve bi’r-i mâ ebniyesi intikāl-i âdî ile bana intikāl etmişidi. Hâlâ menzil-i mezbûrun ebniye-i memlûkesini, bi cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile mûmâ-ileyh Hüseyin Ağa’ya üç yüz kıt‘a esedî guruşa bey‘ ve teslîm ve temlîk, ol dahi vech-i muharrer üzre iştirâ ve kabûl ve temellük ve kabz ve tesellüm ve arsateyn-i mezbûreteyn ile köşkün ve bi’r-i mâ arsasını mütevellîleri izin ve ma‘rifetiyle yine mûmâ-ileyh Hüseyin Ağa’ya meccânen ferâğ ve tefvîz, ol dahi [72a] tefevvüz ve kabûl eyledikden sonra semen-i mezbûr üç yüz guruşu tamâmen ahz u kabz eyledim. Ba‘de’l-yevm menzil-i mahdûd-ı mezkûrun ebniye-i memlûkesi merkūm Hüseyin Ağa’nın mülk-i müşterâsı ve arsateyn-i mezbûreteyn ile ve köşk ve bi’r-i mâ ebniyesi dâhil-i havza-i tasarrufu olmuşdur. Benim vechen mine’l-vücûh alâka ve medhalim kalmadı. Keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb ve imlâ olundu. Fi’l-yevmi’l-hâmis aşer min Cumâdelâhire li sene isneteyn ve mi’e ve elf. Şuhûdü’l-hâl: İsmail Efendi b. İbrahim el-imâm, Mehmed Efendi b. Mustafa el-imâm, Süleyman Efendi b. Mehmed el-imâm, İbrahim Çelebi b. Osman, İbrahim Çelebi b. Mehmed, İbrahim Çelebi b. el-Hâc Hüseyin, Abdullah Efendi b. el-Hâc Veli, Hasan Efendi b. el-Hâc Ramazan, İbrahim Çelebi b. Ahmed, Mustafa b. Ahmed, Abdurrahman Efendi el-kâtib, Nuh Efendi el-kâtib.