Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 64 Hüküm no: 10 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem Hatun Vakfı’na ait olup Haraççı Muhyiddin mahallesindeki evin Müderris Ahmed Efendi’ye tahsisi Bâ-imzâ-i hazret-i veliyyü’n-ni‘am efendi. Ashâb-ı hayrâtdan merhûme Meryem Hatun bt. ( ) nâm sâhibetü’l-hayrın süknâsı ulemâdan bir recül-i sâlih kimesneye vakfı olup mahmiye-i İstanbul’da merhûm ve mağfûrun-leh Sultân Mehmed Han -aleyhi’r-rahmetü ve’l-gufrân- Câmi‘-i şerîfi kurbünde Haraççı Muhyiddin mahâllesinde vâki‘ bir tarafdan fahrü’l-müderrisîni’l-kirâm Şaban Efendi menzili ve bir tarafdan Pazar-ı Sefer ve ba‘zan Ebezâde Fâtıma nâm hatun menzili ve bir tarafdan Kâtib Lütfü Efendi menzili ve taraf-ı râbiden tarîk-i âm ile mahdûd ma‘lûmü’l-müştemilât menzile tevcîh-i hâkimü’ş-şer‘le mutasarrıf olan müşârün-ileyh Şaban Efendi b. Mehmed’in süknâya ihtiyâcı olmayıp menzil-i mezbûrdan rızâ ve ihtiyârıyla kasr-ı yed etmeğin menzil-i mezbûrun süknâsı ber-mûceb-i şart-ı vâkıfe müşârün-ileyh Şaban Efendi’nin sulbî [oğlu] olup süknâya ihtiyâcı olan işbu bâ‘isü’l-kitâb fahrü’l-müderrisîni’l-kirâm Ahmed Efendi’ye tevcîh olunup tasarrufu için kıbel-i şer‘den işbu vesîka-i enîka ketb olundu. Fi’l-yevmi’l-âşir mine’l-Muharremü’l-haram li-sene sitte aşere ve mi’e ve elf. Şuhûdü’l-hâl: Fahrü’l-a‘yân Mehmed Bey b. Mustafa, Fahrü’l-müderrisîn İbrahim Efendi b. Mehmed, Fahrü’l-müderrisîn Ali Efendi b. Süleyman, Fahrü’l-küttâb Lütfullah Efendi, fahrü’l-eimme Halil Efendi imam-ı evvel-i câmi‘-i Sultân Mehmed, Ahmed Efendi b. Ramazan imam-ı mahâlle-i mezbûre, fahrü’l-küttâb Bayram Efendi b. Veli, Abdurrahman Efendi b. Mehmed Rıfkı, İbrahim Efendi b. el-Hâc Mustafa, Hüseyin Efendi b. Mehmed, Hacce Abdullah Efendi b. Mehmed, Musa Efendi b. Hüseyin, Sahâf Abdülkerim Çelebi b. Abdullah, Mustafa Efendi b. Halil, Sefer b. Muslı, Çukadâr Abdullah b. Nimetullah, el-Hâc Ali Efendi b. Abdullah, Odabaşı Ahmed Beşe.