Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 64 Hüküm no: 11 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. İbrahim’in, sahibi tarafından elinden alınan cariye için Ahmed Efendi’ye ödediği paranın geri alınması Mahmiye-i İstanbul’da Sultân Mehmed Câmi‘-i şerîfi kurbünde Mustafa Bey mahâllesi sâkinelerinden işbu bâ‘isü’l-kitâb b Safiye bt. İbrahim nâm hatun mahmiye-i mezbûrede meclis-i şer‘-i hatîrde es-Seyyid Ahmed Efendi b. es-Seyyid Mehmed mahzarında üzerine da‘vâ ve takrîr-i kelâm edip mezbûr es-Seyyid Ahmed Efendi bundan akdem yedinde mülkü ve hakkı olmak üzere işbu hâzıra bi’l-meclis orta boylu elâ gözlü açık kaşlı ( ) nâm câriyeyi iki yüz otuz guruş semen-i makbûza bana bey‘ ü teslîm ben dahi iştirâ ve tesellüm edip mevsûfe-i mezbûre yedimde iken vilâyet-i Kırım’da Gözleve kasabasında sâkine Reyhane bt. Ahmed b. Kuzman Ali nâm hatunun mülkü olup yedinden târîh-i kitâbdan on dört ay mukaddem zâyi‘ olduğunu kasaba-i mezbûrede hâkimü’ş-şer‘ olan Abdülgaffar Efendi b. el-Hâc Mehmed b. Ali huzûrunda Mehmed Odabaşı b. Mustafa b. Mehmed ve Halil b. Mevlüd b. Yasin nâm kimesneler şehâdetleriyle isbât ve ba‘de’t-tahlîf mevsûfe-i mezbûreyi vâzı‘ü’l-yed olanlardan da‘vâ ve taleb ve ahz u kabza ve kendüye îsâle ve bunlar mütevakkıf olduğu umûrun küllîsine tarafından li-ebeveyn karındaşı Abbas nâm kimesneyi nakl-i şer‘iyye ile vekîl ve nâib-i menâb nasb u ta‘yîn edip ol dahi [4a] vekâlet-i mezbûreyi kabûl etmekle mahmiye-i mezbûreye gelip mevsûfe-i mezbûreyi bi’l-vekâle benden hâkim-i muvakkı‘-ı sadr-ı kitâb huzûrunda da‘vâ ben dahi inkâr etmekle ol dahi vekâletini kitâb-ı naklin zeylinde olan şuhûd-i tarîkden Mustafa b. Abdullah b. Abdurrahman ve Mehmed Beşe b. Abdullah b. Abdullah nâm kimesneler şehâdetleriyle muvâcehemde isbât ve istihkākını dahi Mehmed b. Mustafa ve Abdullah Bey ve Merd? Hüseyin b. Yusuf ve Molla İsmail b. İlyas nâm kimesneler şehâdetleriyle ba‘de’l-isbât hükm-i hâkim-i müşârün-ileyh ile mevsûfe-i mezbûre Devletbay nâm tuhme câriyeyi bi’l-istihkāk yedimden müvekkilesi için nez‘ ü ahz etmeğin bu vech üzere yedimden nez‘ ü ahz olan mevsûfe-i mezbûre mezbûr es-Seyyid Ahmed Efendi’nin iki yüz otuz guruş semen-i medfû‘a bana bey‘ etdiği bi-aynihâ merkūme Devletbay câriye olmağın hâlâ mezbûr es-Seyyid Ahmed Efendi’ye suâl olunup mevsûfe-i mezbûre için semen deyü benden ahz edip makbûzu olan meblağ-ı mezbûr iki yüz otuz guruşu bana redd ü teslîm etmek üzere tenbîh olunmak matlûbumdur dedikde gıbbe’s-suâl mezbûr es-Seyyid Ahmed Efendi cevâbında fi’l-hakīka müdde‘iye-i mezbûrenin minvâl-i muharrer üzere yedinden bi’l-istihkāk nez‘ ü ahz olunan işbu hâzıra bi’l-meclis mevsûfe-i mezbûre Devletbay nâm tuhme câriye kendinin iki yüz otuz guruşa müdde‘iye-i mezbûreye bey‘ ve kabz-ı semen eylediği bi-aynihâ mezbûre Devletbay olduğunu ikrâr etmekle ikrârı mûcebince semen deyü makbûzu olan meblağ-ı mezbûr iki yüz otuz guruşu müdde‘iye-i mezbûreye redd ü teslîme mezbûr es-Seyyid Ahmed Efendi’ye tenbîh birle mâ-vaka‘a bi’t-taleb ketb olundu. Fi’l-yevmi’l-âşir min-Muharremü’l-haram li-sene sitte aşere ve mi’e ve elf. Şuhûdü’l-hâl: el-Hâc Mehmed Efendi el-kādı, İsmail Efendi kâtib, Ömer Efendi, kâtib, Veliyüddin Efendi, Emin Mehmed Efendi.