Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 66 Hüküm no: 12 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin Hasan Efendi’den aldığı borç karşılığında evini rehin vermesi Mahmiye-i İstanbul’da Mimarsinan mahâllesinde sâkin Ahmed Efendi b. Mustafa nâm kimesne mahmiye-i mezbûrede meclis-i şer‘-i hatîrde işbu bâ‘isü’l-vesîka Hasan Efendi b. Davud mahzarında ikrâr ve takrîr-i kelâm edip mahâlle-i mezbûrede vâki‘ bir tarafdan kendi tasarrufumda olan vakıf menzil ve bir tarafdan ba‘zan Mustafa Efendi ve ba‘zan Şeyh Hamza Efendi mülkleri ve bir tarafdan Hacce Hatun mülkü ve bir tarafdan tarîk-i âm ile mahdûd dâhiliye ve hâriciyede fevkānî ve tahtânî büyût-ı adîde ve bahçe ve su kuyusu ve kenîfi müştemil mülk menzilimi mezbûr Hasan Efendi’ye bi-tarîkı’l-istiğlâl beş yüz guruşa bey‘ ü teslîm ol dahi ber-vech-i muharrer iştirâ ve tesellüm ve kabz ve kabûl eylediğinden sonra semeni olan meblağ-ı mezbûr beş yüz guruşu mezbûr Hasan Efendi yedinden ahz u kabz eylediğimden sonra yine menzil-i mahdûd-ı mezbûru merkūm Hasan Efendi gıbbe’t-tahliyeti’ş-şer‘iyye ve’t-takābuzü’l-mer‘î beher sene yüz guruşa olmak üzere târîh-i kitâbdan iki sene tamâmına değin cem‘an iki yüz guruşa bana icâr ve teslîm ben dahi ber-[vech-i] muharrer isticâr ve tesellüm ve kabz ve kabûl eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 11 min-Muharremü’l-haram sene 1116. Şuhûdü’l-hâl: Kavukçu Mustafa Çelebi b. Ali, Ahmed Efendi b. Mehmed, Ali Beşe b. Ahmed, Abdullah Çelebi b. Abdullah, el-Hâc Mehmed b. Hüseyin, Ali Çelebi b. Yakub, Mehmed Çelebi b. Ali, el-Hâc Yusuf b. Osman