Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 66 Hüküm no: 13 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali b. Mehmed’in, Mehmed Odabaşı’da olan alacağının varislerine ödenmesi Vilâyet-i Anadolu’da Kastamonu sancağında Küre kazâsına tâbi‘ Ortaca nâm karyede sâkin iken bundan akdem vefât eden es-Seyyid Ali b. Mehmed’in sulbî sagīr oğlu es-Seyyid Ahmed ve sulbiye sagīre kızı Şerîfe Fâtıma’nın tesviye-i emrlerine kıbel-i şer‘den mansûbe vasiyeleri olan vâlideleri Hadîce Hatun bt. Mustafa b. İsa tarafından husûs-ı âti’l-beyana vekîl olduğu zât-ı mezbûreyi ma‘rifet-i şer‘iyye ile ârifân olan İbrahim b. Mustafa ve Ömer Beşe b. Osman nâm kimesneler şehâdetleri ile şer‘an sâbit olan bâ‘isü’l-kitâb es-Seyyid Abdullah b. Ahmed nâm kimesneler mahmiye-i İstanbul’da meclis-i şer‘-i hatîrde dergâh-ı âlî yeniçerilerinin on yedinci sekbânlara mahsûs oda ahâlîsinden Mehmed Odabaşı b. Şaban nâm kimesne mahzarında üzerine da‘vâ ve takrîr-i kelâm edip mezbûr Mehmed Odabaşı zimmetinde temessükü mûcebince mâl-ı eytâmdan yüz otuz yedi guruş olmağla hâlâ vekâletim hasebiyle meblağ-ı merkūmu mezbûr Mehmed Odabaşı’dan taleb eylediğimde bana edâdan imtinâ‘ eder. Su’âl olunsun dedikde gıbbe’s-suâl mezbûr Mehmed Odabaşı cevâbında fi’l-hakīka mâl-ı eytâmdan zimmetimde ancak yüz guruş deynim olup ziyâde iddi‘â olunan otuz yedi guruş ribâdır deyü müdde‘î-i mezbûru ba‘zı müdde‘âsında def‘le mukābele edicek gıbbe’l-istintâk mezbûr Mehmed Odabaşı’dan def‘-i mezkûruna beyyine taleb olundukda ityân-ı beyyine için istimhâl etmeğin mehl-i şer‘î ile ba‘de’l-imhâl ikrârı mertebesi olan yüz guruşu müdde‘î-i mezbûr es-Seyyid Abdullah’a edâ ve teslîme mezbûr Mehmed Odabaşı’ya tenbîh birle mâ-vaka‘a bi’t-taleb ketb olundu. Fi 11 min-Muharremü’l-haram sene 1116 Şuhûdü’l-hâl: el-Hâc Yusuf b. Osman, İsmail Efendi el-Kâtib, Ömer Efendi b. Ali el-Kâtib, Mehmed Efendi b. Ahmed el-kādı.