Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 67 Hüküm no: 14 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un cariyesi Gülistan’da, boşandığı eşi Receb Çavuş’un hakkı olmadığı Sah Mahmiye-i İstanbul’da Muslı mahâllesinde sâkine bâ‘isetü’l-kitâb Âişe bt. Mustafa nâm hatun mahmiye-i mezbûrede meclis-i şer‘de zevc-i sâbıkı Receb Çavuş b. Yusuf nâm kimesne mahzarında üzerine da‘vâ ve takrîr-i kelâm edip mezbûr Receb Çavuş ile zevciyet beynimizde kāime iken ber-mûceb-i defter beynimizde ma‘lûm eşyâmdan fuzûlen [â]hara bey‘ ve kabz-ı semen eylediği akçeden ve cihet-i karzdan zimmetinde hakkım olan dört yüz guruşu bundan akdem mezbûr Receb Çavuş’dan taleb ve da‘vâ eylediğimde ol dahi cevâbında meblağ-ı mezbûru tamâmen sana edâ eyledim deyüp bu vecih üzere beynimizde münâza‘ât-ı kesîre vukū‘undan sonra vesâtet-i muslihîn ile mezbûr Receb Çavuş benim ile da‘vâ-i mezkûremden iki yüz yirmi guruşa sulh oldukda ben dahi sulh-ı mezbûru kabûl ve mâ‘adâsı olan yüz seksen guruş da‘vâsından mezbûr Receb Çavuş’un zimmetini ibrâ ve iskāt edip ol dahi beynimizde ma‘lûm Gülistan nâm Gürciye câriyeye ve hukūk-ı zevciyete ve gayra müte‘allıka âmme-i da‘vâdan beni ibrâ ve iskāt etmeğin hâlâ câriye-i mezkûreyi işbu hâzıra bi’l-meclis es-Seyyid İbrahim b. es-Seyyid Hasan’a bey‘ murâd eylediğimde mezbûr Receb Çavuş bi-gayrı vech-i şer‘î bey‘ime mâni‘ olur. Suâl olunup bî-vech mu‘ârazadan men‘ ü def‘ olunmak matlûbumdur dedikde gıbbe’s-suâl mezbûr Receb Çavuş cevâbında fi’l-hakīka müdde‘iye-i mezbûre ile da‘vâ-i mezkûresinden vech-i muharrer üzere iki yüz yirmi guruşa sulh olup hukūk-ı zevciyete ve gayra müte‘allıka âmme-i da‘vâdan birbirini ibrâ ve iskāt eylediklerini ikrâr lâkin sulh-ı mezbûrda câriye-i merkūme dâhil değildir deyü inkâr edicek, müdde‘iye-i mezbûreden müdde‘âsını mübeyyine beyyine taleb olundukda udûl-i Müslimînden ve mahmiye-i mezbûrede Mehmed Ağa mahâllesi sükkânından İsmail Efendi b. Siyavuş ve Mehmed Efendi b. Osman ve Âşıkpaşa mahâllesinden Ömer Efendi b. Ali nâm kimesneler li-ecli’ş-şehâde meclis-i şer‘e hâzirûn olup istişhâd olunduklarında fi’l-hakīka işbu müdde‘iye-i mezbûre Âişe Hatun zevc-i sâbıkı mezbûr Receb Çavuş ile dört yüz guruş da‘vâsından iki yüz yirmi guruşa sulh olup mâ‘adâ yüz seksen guruşdan mezbûr Receb Çavuş’un zimmetini ibrâ ve iskāt etdikde merkūm Receb Çavuş dahi beynlerinde ma‘lûm Gülistan nâm Gürciye câriyeye ve hukūk-ı zevciyete ve gayre müte‘allıka âmme-i da‘vâdan bizim huzûrumuzda müdde‘iye-i mezbûre Âişe Hatunu ibrâ ve iskāt eyledi. Sulh-ı mezkûrda câriye-i merkūme dahi dâhildir, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince mezbûr Receb Çavuş bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâmin min-şehri Muharremü’l-haram sene sitte ve aşere ve mi’e ve elf. Şuhûdü’l-hâl: el-Hâc Mehmed Efendi b. Ahmed, Hüseyin Efendi b. Himmet, Veliyüddin Efendi b. Ali, el-Hâc Yusuf b. Osman