Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 68 Hüküm no: 15 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi’nin vakıf arsa üzerindeki evini Sipahiler Çavuşu Ali Çelebi’ye satması Mahmiye-i İstanbul’da Haraççı Muhyiddin mahâllesi sâkinlerinden Hüseyin Efendi b. Mahmud Efendi nâm kimesne mahmiye-i mezbûrede meclis-i şer‘de işbu râfi‘ü’l-vesîka Sipâhîler Çavuşu Ali Çelebi b. Abdülgubar nâm kimesne mahzarında ikrâr-ı tam ve takrîr-i kelâm edip akd-i âti’z-zikrin sudûruna değin silk-i mülkümde münselik olup arsasının merhûm Hocazâde Mustafa Efendi Vakfı’na senede yüz seksen akçe mukāta‘ası olup binâsı mülküm olan mahâlle-i mezbûrede vâki‘ bir tarafdan Abdülbaki nâm kimesne mülküne ve iki tarafdan İbrahim Ağa mülküne ve bir tarafdan ba‘zan Yakub Efendi mülkü ve ba‘zan tarîk-i hâs ile mahdûd bir bâb fevkānî ve bir bâb tahtânî odayı ve iki sofa ve bir dehlizi ve bi’r-i mâ ve kenîfi ve havluyu ve eşcâr-ı müsmire ve gayr-ı müsmire bahçemi müştemil menzilimin binâsını bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile yüz yetmiş guruşa mezbûr Ali [Ça]vuş’a bey‘ ve teslîm ve arsasını dahi vakf-ı mezbûr mütevellîsi ma‘rifetiyle meccânen ferâğ ve tefvîz edip ol dahi vech-i muharrer üzere iştirâ ve tesellüm ve tefevvüz etdikden sonra semeni olan meblağ-ı mezbûr yüz yetmiş guruşu merkūm Ali Çavuş yedinden ahz u kabz eyledim. Min-ba‘d menzil-i mahdûd-ı mezbûrun binâsı merkūm Ali Çavuş’un mülk-i müşterâsı ve arsası hakk-ı müfevvezi olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis aşer min-Muharrem sene 1116 Şuhûdü’l-hâl: el-Hâc İbrahim Ağa b. Halil, Abdülbaki Çelebi b. Hasan, Mehmed Çelebi b. Mustafa, İbrahim b. Mehmed, Himmet b. Mehmed, Mehmed Çelebi b. Mustafa, el-Hâc Yusuf b. ( ).