Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 69 Hüküm no: 16 Orijinal metin no: [4b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Gülistan’ın cariyesi Rus asıllı Gülbuy’u vasiyetle azat ettiği Mahmiye-i İstanbul’da Ali Fakıh mahâllesinde sâkine iken bundan akdem fevt olan Gülistan bt. Abdullah nâm hatunun zâhirde zevc-i metrûku Süleyman b. Abdullah nâm kimesneden gayrı vârisi olmayıp terekesinin nısfı mezbûr Süleyman’a ve nısf-ı âharı cânib-i beytülmala âid oldukdan sonra mezbûr Süleyman mahmiye-i mezbûrede meclis-i şer‘de müteveffât-ı mezbûrenin hayâtında câriye-i memlûkesi olup tedbîr-i mutlak ile müdebbere eylediği işbu orta boylu mâ’î gözlü Rusiyyetü’l-asl râfi‘atü’l-vesîka Gülbuy mahzarında ikrâr ve takrîr-i kelâm edip zevcem müteveffâ-yı mezbûre hayâtında yedinde mülkü olduğu hâlde mevsûfe-i mezbûre Gülbuy’u tedbîr-i mutlak ile müdebbere eyleyip ba‘dehâ zevcem mezbûre Gülistan fevt olup terekesinin nısfı bana ve nısf-ı [5a] âharı cânib-i beytülmala âid olmağla mevsûfe-i mezbûre Gülbuy târîh-i kitâbdan iki gün mukaddem zevcem müteveffât-ı mezbûre merkūme Gülistan’ı hayâtında kendini tedbîr-i mutlak ile müdebbere eylediğini benim ile kābız-ı beytülmal muvâcehesinde şuhûd-ı udûl ile isbât eyledi tedbîr-i mezbûre vasiyete râci‘ olup ben dahi mücîz olmağla bu vech üzere vasiyet-i mezbûre beytülmaldan bi-hasebi’ş-şer‘ mukaddem olup mevsûfe-i mezbûre Gülbuy sâir harâir-i asliyât gibi hürre olmuşdur min-ba‘d alâka ve medhalim yokdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Muharremü’l-haram li-sene aşere ve mi’e ve elf. Şuhûdü’l-hâl: Es-Seyyid Salih b. Mehmed, Abdi b. Receb, Ömer b. Di[laver], Ali b. Receb, Mehmed b. İbrahim, Mehmed b. Yusuf, Mehmed Çavuş mübâşir.