Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 69 Hüküm no: 17 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neslihan Hatun’un Kadıasker Mehmed Efendi mahallesindeki evini Mehmed Ağa’ya satması Bâ-imzâ-i hazret-i veliyyü’n-ni‘am Mahmiye-i İstanbul’da Kādıasker Mehmed Efendi mahâllesinde sâkine Neslihan bt. Abdullah nâm hatun zâtı ba‘de’t-ta‘rîfi’ş-şer‘î mahmiye-i mezbûrede meclis-i şer‘de işbu bâ‘isü’l-kitâb Mehmed Ağa b. Ali mahzarında ikrâr-ı tam ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahâlle-i merkūmede vâki‘ bir tarafdan el-Hâc Mehmed b. Mehmed nâm kimesne menzili ve bir tarafdan mahâlle-i mezbûre imamına meşrûta vakıf menzil ve bir tarafdan Mehmed Çelebi b. Mustafa menzili ve taraf-ı râbii tarîk-i âm ile mahdûd hâriciyesi fevkānî üç bâb oda ve bir sofa ve tahtânî iki bâb oda ve kenîf ve ahır ve bi’r-i mâ ve dâhiliyesi üç bâb fevkānî oda ve bir sofa ve tahtânî iki bâb oda ve matbâh ve kenîf ve bi’r-i mâ ve zât-ı eşcâr-ı müsmire ve gayr-ı müsmire bahçe ve bir mikdâr havluyu müştemil mülk menzilimi âmme-i tevâbi‘ ve levâhıkı ile mezbûr Mehmed Ağa’ya bin yüz elli kıt‘a esedî guruşa tarafeynden îcâb ve kabûlü hâvî ve şurût-ı müfsideden ârî bey‘-i kat‘î ile bey‘ ü temlîk ve teslîm edip, ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr bin yüz elli guruşu yedinden tamâmen ahz u kabz eyledim. Fîmâ-ba‘d menzil-i mahdûd-ı mezbûrda benim kat‘â alâka ve medhalim kalmadı, mezbûr Mehmed Ağa’nın mülk-i müşterâsıdır, keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Muharremü’l-haram li-sene sitte aşere ve mi’ete ve elf. Şuhûdü’l-hâl: İmam Hasan Efendi b. ( ), Hüseyin Beşe b. Odabaşı Ahmed, Ali b. Hüseyin Odabaşı, Mustafa b. Hasan, Abdullah b. Mustafa, Halil Beşe b. Abdullah, Hasan Odabaşı b. Alaeddin, Sâbıkā Hasan b. Ali Odabaşı, Mehmed Ağa çorbacı, Mustafa Çelebi b. Ahmed, İbrahim Çelebi b. Abdullah, el-Hâc Mehmed b. Mehmed, Süleyman Çelebi b. Hasan, el-Hâc Yusuf.