Bab Mahkemesi 54 Numaralı Sicil (H. 1102 / M. 1691) cilt: 20, sayfa: 344 Hüküm no: 415 Orijinal metin no: [72a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Hasan’ın, evini Mahmud Efendi Vakfı’na bey‘ bi’l-istiğlâl yoluyla satması Mahmiye-i İstanbul’da Manisalı Çelebi mahallesi sükkânından Mehmed Çelebi b. Hasan nâm kimesne meclis-i şer‘-i şerîf-i enverde, merhûm Mahmud Efendi nâm sâhibü’l-hayrın nukūd-ı mevkūfesine bi’l-fi‘il mütevellî olan Mustafa Efendi b. Rüstem tarafından ikrâr-ı âti’z-zikri tasdîka vekîl olduğu Hasan Çelebi b. İsmail ve İbrahim Çelebi b. Yusuf şehâdetleriyle şer‘an sâbit olan el-Hâc Mustafa b. el-Hâc Veli mahzarında ikrâr-ı tâm ve takrîr-i kelâm edip, silk-i mülkümde münselik olup mahalle-i mezbûrede vâki‘ bir tarafı Kehhâlzâde el-Hâc Mehmed menzili ve bir tarafdan Sarrâc Ahmed Çelebi mülkü ve bir tarafı Rifâîzâde Mehmed Efendi mülkü ve bir tarafı tarîk-i hâs ile mahdûd, büyût-ı adîdeyi müştemil mülk menzilimi, mütevellî-i mezbûr Mustafa Efendi’ye yüz kıt‘a esedî guruşa bi tarîki’l-istiğlâl bey‘ ve teslîm, ol dahi nakd-i mevkūfe-i mezbûre ile bi’t-tevliye iştirâ ve kabûl ve tesellüm edip, semen-i mezbûr yüz kıt‘a esedî guruşu yedinden tamâmen ahz u kabz eylediğimden sonra mütevellî-i mezbûr Mustafa Efendi menzil-i mahdûd-ı mezbûru ba‘de’t-tahliyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin on beş kıt‘a esedî guruşa bana îcâr ve teslîm, ben dahi istîcâr ve kabûl ve tesellüm eyledim dedikde, gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min Cumâdelâhire li sene isneteyn ve mi’e ve elf. Şuhûdü’l-hâl: Hasan Çelebi b. Abdullah, Kehhâlzâde el-Hâc Mehmed, Ömer Çavuş b. el-Hâc Mehmed, Ömer Çavuş b. Osman, Ebûbekir Çelebi b. Mehmed, Zâkirzâde Feyzullah Çelebi.