Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 73 Hüküm no: 23 Orijinal metin no: [6a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kilis’in Ağzaz nahiyesi Kefer Süleyman köyü öşrünün Abdülhak Çelebi’ye iltizama verilmesi Medîne-i Haleb’de vâki‘ Sâhibiye Medresesi’nin bi’l-fi‘il mütevellîsi olan Nazım el-Mültekā Mehmed Efendi b. Fahreddin mahmiye-i İstanbul’da meclis-i şer‘-i hatîr-i lâzımü’t-tevkīrde işbu bâ‘isü’l-vesîka es-Seyyid Abdülhak Çelebi b. es-Seyyid Ahmed nâm kimesne mahzarında ikrâr-ı tam ve takrîr-i kelâm edip medrese-i mezbûre evkāfı kurâsından olup vilâyet-i Anadolu’da Kilis kazâsında Ağzaz nâhiyesinde Kefer Süleyman nâm karyenin a‘şâr-ı şer‘iyye ve rüsûm-ı örfiyesin bin yüz on beş senesi Martı ibtidâsından bir sene tamâmına değin voyvoda maktû‘undan mâ‘adâ dört yüz guruş bedel mukābelesinde mezbûr es-Seyyid Abdülhak Çelebi’ye bi’t-tevliye der-uhde ve iltizâm ol dahi ber-vech-i muharrer iltizâm ve kabûl edip bedel-i iltizâm olan meblağ-ı mezbûr dört yüz guruşu târîh-i kitâbdan yüz beş gün tamâmına değin bana teslîm etmek üzere bi’t-terâzî mezbûr es-Seyyid Abdülhak Çelebi’yi tecîl eyledim dedikde, gıbbe’t-tasdîki’l-mu‘teber mâ-vaka‘a bi’t-taleb ketb olundu. Fi’l-yevmi’s-sâlis aşer min-Muharremü’l-haram li-sene sitte ve aşere ve mi’ete ba‘de’l-elf. Şuhûdü’l-hâl: el-Hâc Mehmed Efendi el-kādı, İsmail Efendi el-kâtib, Ömer Efendi el-kâtib, Emin Mehmed Efendi el-kādı, Mehmed Çelebi b. Hasan, Mehmed Çelebi b. Hasan