Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 74 Hüküm no: 24 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Recep Kapudan’ın vasiyeti üzere terekesinden 300 kuruşun azatlı kölesi Hasan’a teslim olunması Sâbıkā kalyon kapudanı olup mahrûse-i Galata hısnı ebvâbından Kürkçü Kapısı hâricinde Kara Mustafa Paşa Hanı’nda sâkin iken bundan akdem vefât eden el-Hâc Receb Kapudan b. Hızır b. Abdullah’ın mu‘takı bâ‘isü’l-kitâb el-Hâc Hasan b. Abdullah nâm kimesne mahmiye-i İstanbul’da meclis-i şer‘-i hatîrde müteveffâ-yı mezbûrun vesâyâsını tenfîze vasiyy-i muhtârı olmağla terekesine vâzı‘ü’l-yed olan Mehmed Efendi b. Ahmed nâm kimesne mahzarında üzerine da‘vâ ve takrîr-i kelâm edip mevlâm müteveffâ-yı mezbûr el-Hâc Receb Kapudan hasta ve sâhib-i firâş olduğu hâlde bin yüz on beş senesi Zilhiccesi’nin selhi gününde mahzar-ı Müslimînde sülüs malından bana üç yüz guruş vasiyet ve musırran alâ-îsâihî fevt olup sülüs malı müsâ‘id olmağla meblağ-ı merkūmu mevlâm müteveffâ-yı mezbûrun terekesine vâzı‘ü’l-yed olan merkūm Mehmed Efendi’den taleb eylediğimde bana teslîmden imtinâ‘ eder. Suâl olunsun dedikde, gıbbe’s-suâl mezbûr Mehmed Efendi cevâbında fi’l-hakīka tereke-i müteveffâ-yı mezbûra bi’l-vesâye vaz‘-ı yedini ikrâr lâkin müdde‘î-i mezbûrun ber-vech-i muharrer müdde‘âsını inkâr edicek müdde‘î-i mezbûr el-Hâc Hasan’dan müdde‘âsını mübeyyine beyyine taleb olundukda udûl-i Müslimînden ve mahrûse-i mezbûre muzâfâtından kasaba-i Tophane’de İlyas Çelebi mahâllesi sükkânından Osman Çelebi b. Ali ve Firuzağa mahâllesi sükkânından Mehmed Çelebi b. Mustafa nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka sâbıkā kalyon kapudanı olup mahrûse-i Galata hısnı ebvâbından Kürkçü Kapısı hâricinde Kara Mustafa Paşa Hanı’nda müsâfiren sâkin iken bundan akdem vefât eden el-Hâc Receb Kapudan b. Hızır b. Abdullah hasta ve sâhib-i firâş olduğu hâlde bin yüz on beş senesi Zilhiccesi’nin selhi gününde bi-emrillâhi te‘âlâ vefât eylediğimde sülüs malımdan mu‘takım el-Hâc Hasan’a üç yüz guruş verile deyü bizim huzûrumuzda vasiyet ve musırran alâ-îsâihî fevt oldu ve sülüs malı dahi meblağ-ı merkūma müsâ‘iddir, müdde‘î-i mezbûr için meblağ-ı merkūmu tereke-i müteveffâ-yı mezbûrdan vasiyy-i merkūmdan hakk-ı taleb ve ahz vardır, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm mezbûr el-Hâc Hasan meclis-i mezkûrda vasiyy-i merkūm Mehmed Efendi mahzarında ikrâr ve takrîr-i kelâm edip ânifen bana edâ ve teslîmine hüküm olunan meblağ-ı mezbûr üç yüz guruşu tereke-i müteveffâ-yı mezbûrdan vasiyy-i mezbûr Mehmed Efendi bana tamâmen edâ ve teslîm ben dahi yedinden ahz u kabz eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 15 min-Muharremü’l-haram sene 1116 Şuhûdü’l-hâl: Mehmed Çelebi b. Mustafa, Mustafa b. Mehmed, Hüseyin b. Abdullah, Molla Mehmed b. Osman, el-Hâc Salih b. Abdullah, İbrahim b. Ali, el-Hâc Ebubekir b. Halil, el-Hâc Hasan b. el-Hâc Mustafa.