Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 75 Hüküm no: 25 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’nın Demirhisar Kadısı Veliyüddin Efendi’de olan alacağının bir kısmını tahsil ve kalanını tecil etmesi Vilâyet-i Rumeli’de Karaferye mahâllâtından Câmi‘-i atik mahâllesi sükkânından Osman Ağa b. Mustafa nâm kimesne mahmiye-i İstanbul’da meclis-i şer‘-i hatîrde sâbıkā Demirhisar kādısı olan bâ‘isü’l-kitâb Veliyüddin Efendi b. Ali mahzarında ikrâr ve takrîr-i kelâm edip mezbûr Veliyüddin Efendi zimmetinde beynimizde ma‘lûm çuka ve kürk semenlerinden kırk iki guruş ve bin yüz on dört ve yüz on beş senelerinde kazâ-i mezbûra tâbi‘ Sengel Mukāta‘ası’nın zâbiti olmağla bir beytülmal husûsu için bi-tarîkı’r-rüşvet def‘ ü teslîm eylediğim elli guruş ve iki hüccet husûsu için bir def‘a otuz guruş ve bir def‘a yirmi beş guruş ki cem‘an yüz kırk yedi guruş hakkımı bundan akdem mezbûr Veliyüddin Efendi’den taleb ve da‘vâ eylediğimde beynimizde münâza‘ât-ı kesîre vâkı‘a olmuş idi el-hâletü hâzihi beynimizde muslihûn tavassut edip da‘vâ-i mezkûremden mezbûr Veliyüddin Efendi benimle altmış guruş üzerine sulh oldukda ben dahi sulh-ı mezbûru kabûl edip mâ‘adâ da‘vâsından mezbûr Veliyüddin efendinin zimmetini ibrâ ve iskāt eylediğimden sonra mezbûr Veliyüddin Efendi mülkü olup İhtiman kazâsına tâbi‘ Hacıhamzalı nâm karye sükkânından Mahmud Çorbacı yedinde vedî‘a olan bir re’s doru aygır atını otuz beş guruşa bana bey‘-i kat‘î ile bey ve temlîk ve mahâllinde kabza beni taslît edip ben dahi ber-vech-i muharrer iştirâ ve temellük ve kabûl edip semen-i mezbûr otuz beş guruş zimmetinde bedel-i sulhdan hakkım olan yetmiş guruşun otuz beş guruşuna takās, ben dahi mukāssa ve kabûl edip bedel-i sulhdan bâkī kalan otuz beş guruşu mezbûr Veliyüddin Efendi’nin âcilen edâya iktidârı olmayıp tecîle tâlib olmağla ben dahi meblağ-ı bâkī otuz beş guruşu târîh-i kitâbdan üç yüz altmış bir gün tamâmına değin bana edâ etmek üzere mezbûr Veliyüddin Efendi’yi tecîl eylediğimde ol dahi kabûl ve ecel-i merkūm tamâmında edâya ta‘ahhüd eyledi. Fîmâ-ba‘d birbirimiz ile bedel-i sulh-ı mezkûrdan bâkī kalan meblağ-ı mezbûr otuz beş guruşdan mâ‘adâ da‘vâ ve nizâ‘ım ve husûmetim kalmadı dedikde, gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-şehri Muharremü’l-haram li-sene sitte aşere ve mi’e ve elf. Şuhûdü’l-hâl: Mehmed Efendi b. Ahmed, Hüseyin Efendi b. Himmet, İsmail Efendi b. Siyavuş, Ömer Efendi b. Ali, Mehmed Efendi el-kādı.