Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 77 Hüküm no: 27 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çavuş’un Yahudi asıllı kölesi Menahim’i sözleşme yoluyla azat etmesi Dergâh-ı âlî çavuşlarından Mehmed Çavuş b. Abdullah nâm kimesne mahmiye-i İstanbul’da meclis-i şer‘-i enverde kendüye rıkkını mu‘terif olan uzun boylu açık kaşlı kara sakallı, kara gözlü Efrenciyyü’l-asl Yahûdîyyü’l-mille işbu râfi‘ü’l-vesîka Menahim v. Avraham muvâcehesinde ikrâr ve takrîr-i kelâm edip mevsûf-ı mezbûr Menahim abd-i memlûküm olup târîh-i kitâb senesi şehri gāyetinden bana üç sene tamâmına değin hizmet edip ba‘dehû âzâd olmak üzere mezbûr Menahim’i kitâbete kat‘ eyledim mezbûr Menahim târîh-i mezbûrdan üç sene tamâmına değin bana edâ-yı hizmet eylediğinden sonra sâir ahrâr-ı asliyyîn [gibi] hür olsun dedikde, ol dahi kitâbet-i mezbûreyi kabûl etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Muharremü’l-haram li-sene sitte aşere ve mi’e ve elf. Şuhûdü’l-hâl: Hüseyin Efendi b. Himmet el-kādı, el-Hâc Mehmed Efendi el-kādı, İsmail Efendi el-kādı, Ömer Efendi el-kādı, Veliyüddin Efendi el-kādı, Yusuf Çelebi b. Abdullah, Ali Çelebi b. Abdullah, Mustafa Dede b. Abdullah, Kadızâde b. Mehmed Efendi, el-Hâc Yusuf b. Osman.