Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 77 Hüküm no: 28 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Pazarbaşı Abdurrahman Ağa’nın varislerine intikal eden alacak hususunda borçlu Diyosisyos’un kefilleriyle sulh olması Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i mergūbdan irsâl olunan mevlânâ Hüseyin Efendi b. Himmet mahmiye-i İstanbul’da Tahtaminâre mahâllesinde sâkin hâlâ Ereğli Metrepolidi olan Diyosisyos? v. Manol nâm râhibin menziline varıp zeyl-i kitâbda muharrerü’l-esâmi Müslimîn huzûrunda akd-i meclis-i şer‘-i mübîn eyledikde mahmiye-i mezbûrede Samanviran mahâllesi ahâlîsinden olup Saray-ı atik-i sultânî pazarbaşısı iken bundan akdem vefât eden Abdurrahman Ağa b. İbrahim nâm kimesnenin verâseti sulbî kebîr oğlu Yusuf Ağa’ya ve sulbiye-i kebîre kızları Havva ve Âişe nâm hatunlara münhasıra olduğu şer‘an sâbit ve zâhir oldukdan sonra zâtını ma‘rifet-i şer‘iyye ile ârifân Sekbânbaşı Ali Ağa mahâllesi ahâlîsinden Abdullah Bey b. Ali ve Soğan[ağa] mahâllesi ahâlîsinden Halil Çelebi b. Mustafa nâm kimesneler ta‘rîfleriyle mu‘arrefe olup kendi tarafından asil ve karındaşları mezbûrân Yusuf Ağa ve Âişe Hatun taraflarından zikri âtî meblağı da‘vâ ve taleb ve ahz u kabza ve kendülere îsâle ve lede’l-iktizâ sulh ve ibrâya ve bunlar mütevakkıf olduğu umûrun küllîsine vekîl olduğu mu‘arrefân-ı mezbûrân şehâdetleriyle sâbit olan mezbûre Havva Hatun meclis-i ma‘kūd-ı mezbûrda hâlâ mahmiye-i mezbûrede kefere patriki olan işbu bâ‘isü’s-sifr Gavril v. Nikola nâm râhib tarafından husûs-ı âti’l-beyana vekîl olduğu nehc-i şer‘î ve tarîk-i mer‘î üzere sâbit olan mezbûr Diyosisyos? muvâcehesinde asâleten ve vekâleten ikrâr ve takrîr-i kelâm edip işbu yedimde olan temessük nâtık olduğu üzere babam müteveffâ-yı mezbûr Pazarbaşı Abdurrahman Ağa’nın cihet-i deyn-i şer‘îden sâbıkā İstanbul kefere patriki olan Şehiroğlanı demekle ma‘rûf Diyosiyos nâm râhib zimmetinde üç bin iki yüz elli guruş hakkı olmağla müvekkil-i mezbûr Gavril’den mukaddem kezâlik kefere patriki olup bundan akdem hâlik olan Kalinkos nâm râhib meblağ-ı mezbûr üç bin iki yüz elli guruşa emir ve kabûlü hâviye kefâlet ile kefil oldukdan sonra müvekkil-i mezbûr Gavril dahi bi-ciheti’l-kefâle hâlik-i mezbûr Kalinkos’un üzerine edâsı lâzım gelen meblağ-ı mezbûra gāib ani’l-meclis Yazıcı Praşkova ile her biri alâ-hıdetin kefil oldukdan sonra babam mezbûr Abdurrahman Ağa meblağ-ı mezbûru kable’l-ahz ve’l-istîfâ vefât edip meblağ-ı mezbûr bi’l-irsi’ş-şer‘î bize isâbet ve intikāl etmekle ben asâleten ve vekâleten meblağ-ı mezbûr üç bin iki yüz elli guruşun yüz guruşunu hâlik-i mezbûr Kalinkos’dan bi-hasebi’l-kefâle hayâtında ahz u kabz ve ba‘de-helâkihi iki yüz guruşunu dahi gāib-i mezbûr Praşkova’dan bi-tarîkı’s-sulh kefâletine binâen alıp kabz edip bu vech üzere meblağ-ı mezbûr üç bin iki yüz elli guruşun üç yüz guruşunu ahz u kabz eylediğimden sonra iki bin dokuz yüz elli guruş bi-hasebi’l-kefâle müvekkil-i mezbûr Gavril zimmetinde bâkī kalmağla meblağ-ı bâkī-i mezbûru müvekkil-i mezbûr Gavril’den bundan akdem Rum Kādıaskeri Efendi hazretleri huzûrunda da‘vâ eylediğimde ol dahi husûs-ı mezbûru bi’l-külliye inkâr etdiğinden sonra zamân mürûr edip yedimde bulunan temessükün ba‘zı yeri mahkūk olmağla beni da‘vâdan men‘ ve i‘lâm olundukdan sonra kanâ‘at etmeyip tekrâr da‘vâya tasaddî eylediğimde müvekkil-i mezbûr ile beynimizde münâza‘ât-ı kesîre cereyân etmişidi el-hâletü hâzihi beynimize muslihûn tavassut edip asâlet ve vekâletime binâen beni da‘vâ-i mezbûremden an-inkâr beş yüz guruş üzerine sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr beş yüz guruşun dört yüz guruşunu nakid ve yüz guruşuna mahsûben meclis-i akd-i sulhda mevcûd iki cedîd sincab kürk ve bir cedîd vaşak parçası kürk ve dört buçuk zirâ‘ neftî çukayı işbu meclis-i ma‘kūd-ı mezbûrda vekîl-i mezbûr Diyosisyos? râhib bana tamâmen def‘ ü teslîm ben dahi asâleten ve vekâleten yedinden ahz u kabz eylediğimden sonra ba‘de’l-yevm müvekkil-i mezbûr Gavril ile husûs-ı mezbûra müte‘allıka vechen mine’l-vücûh da‘vâ ve nizâ‘ım kalmamağın meblağ-ı mezbûr üç bin iki yüz elli guruşa müte‘allıka âmme-i da‘vâdan mezbûr Şehiroğlanı Diyonisyos ile hâlik-i mezbûr Kalinikos’un vereselerinin ve kefil-i mezbûr Gavril’in ve gāib-i mezbûr Yazıcı Praşkova’nın ve manastır ve kilise vakıflarının ve metrepolidlerin ve papaslarının cümlesinin zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim, ba‘de’l-yevm husûs-ı mezbûra müte‘allıka mezbûrûn ile asâleten ve vekâleten da‘vâ ve nizâ‘ım zuhûr ederse lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’ş-şer‘î husûs-ı mezbûru mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr el-Hâc Ali Beşe b. ( ) ve Osman b. Mehmed ile meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî aşer min-Muharremü’l-haram li-sene 1116 Şuhûdü’l-hâl: Halil Ağa b. Mehmed el-mübâşir, Kasab Mustafa Beşe b. Ahmed, Mustafa Beşe b. Bayram, Himmet b. Muslı, Ahmed Bey b. Hüseyin, İsmail b. Cafer, Osman b. Abdülkerim, Mehmed Beşe b. Himmet, Süleyman Çelebi b. Abdullah.