Bab Mahkemesi 54 Numaralı Sicil (H. 1102 / M. 1691) cilt: 20, sayfa: 345 Hüküm no: 416 Orijinal metin no: [72a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultana bt. Polidira’nın menzil hissesini eşi Yorgi v. Yani’ye satması Mahmiye-i İstanbul’da Fenerkapısı dâhilinde Abdisubaşı mahallesinde sâkine olup zâtı Palaş v. Pendari ve Yani v. Dimitri nâm zimmîler ta‘rîfleriyle mu‘arrefe olan Sultana bt. Polidira nâm nasrâniye meclis-i şer‘-i şerîf-i enverde, hâlâ zevci olan işbu râfi‘ü’l-kitâb Yorgi v. Yani nâm zimmî muvâcehesinde ikrâr-ı tâm ve takrîr-i kelâm edip, mahalle-i mezbûrede vâki‘ bir tarafdan Kadıköyü Metropolidi İlya nâm zimmî mülkü ve bir tarafdan Panayot zimmî mülkü ve bir tarafdan kale duvarı ve bir tarafdan tarîk-i âm ile mahdûd fevkānî iki bâb oda ve tahtânî iki bâb oda ve bir mahzen ve bir su kuyusu ve bir kenîfi müştemil mülk menzilin nısfı benim ve nısf-ı âharı zevcim mezbûr Yorgi’nin mülkü olmağla, hâlâ menzil-i mezbûrda olan nısf hisse-i şâyi‘amı, bi cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile iki yüz kıt‘a esedî guruşa bey‘ ve teslîm, ol dahi ber vech-i muharrer iştirâ ve tesellüm ve kabûl ettiğinden sonra semeni olan meblağ-ı mezbûr iki yüz guruşu yedinden bi’t-tamâm ve’l-kemâl ahz u kabz eyledim. Ba‘de’l-yevm menzil-i mahdûd-ı mezkûrun mecmû‘u zevcim mezbûr Yorgi’nin mülkü ve hakkı olmuşdur. Keyfe mâ yeşâ ve yahtâr mutasarrıf olsun dedikde, gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fî evâsıtı Cumâdelâhire li sene isneteyn ve mi’e ve elf. Şuhûdü’l-hâl: İbrahim Çelebi. b. Ahmed, Mustafa b. Şaban, el-Hâc Ali b. Abdullah, Süleyman Efendi b. Abdullah, Abdurrahman Çelebi b. Abdi, Mehmed Ağa b. (…), Kostandi v. Palaşkova, Dimo v. Andriye, Anaştaş v. Todori, İstemad v. Nikola, Papa Landeryo v. Yako, Delot v. Tiryanda, Kabri? v. ( ).