Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 79 Hüküm no: 30 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Edirneli Hüseyin’in Arnavutköy’deki bağını Mehmed Çelebi’ye satması Mahrûse-i Edirne’de Muradiye Küçükpazarı’nda sâkin olup mahmiye-i İstanbul’da müsâfiren sâkin Hüseyin b. Sinan nâm kimesne mahmiye-i mezbûrede meclis-i şer‘de işbu râfi‘ü’l-vesîka Mehmed Çelebi b. Ali nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm olup mahrûse-i mezbûrede Arnavudköyü toprağında vâki‘ etrâf-ı erba‘ası Menzilci el-Hâc Mehmed Ağa bağı ve Kethüdâ es-Seyyid Mehmed Çelebi ve Karaköylü Mehmed Çelebi bağı ve Osman Dede ve oğlu bağı ve Abacı Yorgi nâm zimmî bağı ile mahdûd üç dönüm mülk bağımı tarafeynden bi’l-îcâb ve’l-kabûl bey‘-i kat‘î ile mezbûr Mehmed Çelebi’ye kırk guruşa bey‘ ve temlîk ol dahi iştirâ ve temellük ve kabûl eyledikden sonra semeni olan meblağ-ı mezbûru yedinden tamâmen ahz u kabz eyledim, ba‘de’l-yevm zikr olunan bağ-ı merkūm Mehmed Çelebi’nin mülk-i müşterâsı olmuşdur, mahâllinde kabza taslît eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-Muharremü’l-haram li-sene sitte aşere ve mi’e ve elf. Şuhûdü’l-hâl: Beyaz Mehmed Efendi, Kayyûm Mehmed Çelebi b. Yusuf, Ahmed Çelebi b. Yusuf, Aşçı İbrahim b. Mustafa, Bosnavî Ali Bey, Kâtib Ahmed Çelebi.