Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 81 Hüküm no: 33 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Beşe’nin, Ahmed Ağa’da olan alacağının tahsili Mahmiye-i İstanbul’da Yeniodalar’da Yirmibir Ağa Bölüğü’ne mahsûs odanın odabaşısı ve nukūd-ı mevkūfesine bi’l-fi‘il mütevellî olan işbu râfi‘ü’l-kitâb el-Hâc İsmail Beşe b. Mehmed nâm kimesne mahmiye-i mezbûrede meclis-i şer‘-i hatîrde Ahmed Ağa b. Mehmed nâm kimesne mahzarında üzerine da‘vâ ve takrîr-i kelâm edip mütevellîsi olduğum mâl-ı vakf-ı mezbûrdan merkūm Ahmed Ağa’ya idâne ve teslîm, ol dahi yedimden istidâne ve kabz eylediği on altı guruşun on iki guruşunu bundan akdem merkūm Ahmed Ağa yedinden ahz u kabz edip mâ‘adâsı olan dört guruş ile bir husûsun temşiyeti için bi-tarîkı’r-rüşve yirmi beş guruş dahi merkūm Ahmed Ağa’ya def‘ ü teslîm ol dahi yedimden ahz u kabz edip hattâ şuhûd mahzarında ikrâr ve işhâd dahi etmekle hâlâ meblağayn-ı mezbûreyni merkūm Ahmed Ağa’dan taleb ederim, suâl olunsun dedikde, gıbbe’s-suâl mezbûr Ahmed Ağa cevâbında ancak mâl-ı vakf-ı mezbûra dört guruş deyni olduğunu ikrâr zikr olunan meblağ-ı mezbûr yirmi beş guruşu kabzını inkâr edicek müdde‘î-i mezbûrdan ber-vech-i muharrer müdde‘âsına beyyine taleb olundukda udûl-i Müslimînden Karagümrük kurbünde sâkin olup yirmi bir Ağa bölüğüne mahsûs oda yoldaşlarından Ahmed Beşe b. Hüseyin ve Küçükmustafapaşa mahâllesinden Abdullah b. el-Hâc Satılmış nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka merkūm Ahmed Ağa meblağ-ı mezbûr yirmi beş guruşu müdde‘î-i mezbûr el-Hâc İsmail Odabaşı yedinden ahz u kabz eyledim deyü bundan akdem bizim huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince mu‘terif olduğu meblağ-ı bâkī dört guruş ile meblağ-ı mezbûr yirmi beş guruşu müdde‘î-i mezbûra edâ ve teslîme merkūm Ahmed Ağa’ya tenbîh birle mâ-vaka‘a bi’t-taleb ketb olundu. Fi’l-yevmi’s-sânî aşer min-Muharremü’l-haram li-sene sitte aşere ve mi’e ve elf. Şuhûdü’l-hâl: el-Hâc Mehmed Efendi el-kâtib, Kādızâde Mehmed Efendi kâtib, İsmail Efendi el-kâtib, Ali Beşe b. Mustafa, Mustafa b. Mehmed, el-Hâc Yusuf b. Osman.