Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 82 Hüküm no: 34 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin vefat eden babası Hasan’dan intikal eden ve vasisi Musa Bey’de olan tarlalarını teslim alması Vilâyet-i Anadolu’da Yedidivan kazâsına tâbi‘ Kütil nâm karye ahâlîsinden olup Dergâh-ı âlî -dâme mahfûfen bi’l-meâlî‒ Yeniçerilerinin Yirmibeşinci Cemâ‘atine mahsûs oda neferâtından Mehmed Beşe b. Hasan mahmiye-i İstanbul’da meclis-i şer‘-i hatîr-i lâzımü’t-tevkīrde işbu bâ‘isü’l-kitâb Musa Bey b. Ali nâm kimesne mahzarında bi-tav‘ihî ikrâr u i‘tirâf ve takrîr-i kelâm edip mezbûr Musa Bey babam mezbûr Hasan vefât eyledikde ben sagīr olmağla taht ve tasarrufunda olup intikāl-i âdî ile bana müntakil karye-i mezbûre toprağında vâki‘ lede’l-ahâlî ve’l-cîrân ma‘lûmü’l-hudûd ve’l-kıt‘a tarlalarımı ve meyve eşcârlarımı târîh-i kitâba gelinceye değin bi-gayrı hakkın fuzûlen zabt ve tasarruf ve hâsıl olan mahsûl ve meyvesini ahz ve kendi masârıfına sarfla istihlâk etmekle ben dahi husûs-ı mezbûru bundan akdem mezbûr Musa Bey’den taleb ve da‘vâ eylediğimde beynimizde ba‘de’n-nizâ‘ hâlâ mezbûr Musa Bey’den zikr olunan tarlalardan kasr-ı yed ve mahâllerinde kabza beni taslît ve mahsûl-i müstehlek mukābelesinde dahi bi-tarîkı’s-sulh bana yedi guruş def‘ ü teslîm ben dahi yedinden tamâmen ahz u kabz edip bâlâda zikr olunan husûslara müte‘allıka âmme-i da‘vâdan mezbûr Musa Bey’i ibrâ ve iskāt eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Muharremü’l-haram li-sene sitte aşere ve mi’e ve elf. Şuhûdü’l-hâl: Mustafa Efendi el-kādı, İbrahim Beşe b. Mehmed, Ahmed Çelebi b. Şaban, Ahmed Çelebi b. Süleyman, Molla Ali b. İbrahim, Hüseyin b. Receb, Ahmed b. Mehmed.