Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 83 Hüküm no: 36 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Horasancı Agob’un Eğin’in Apçağa köyündeki bağını Andon’a satması Vilâyet-i Anadolu’da Eğin kazâsına tâbi‘ Apçağa nâm karyeden olup mahmiye-i İstanbul’da Molla Gürânî semtinde horasancı olan Agob v. Sahak nâm zimmî mahmiye-i mezbûrede meclis-i şer‘de işbu bâ‘isü’s-sifr Andon v. Mosis nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup karye-i mezbûre bağları hudûdu dâhilinde vâki‘ bir tarafdan Seyyid Halil nâm kimesne ile Deknar nâm zimmî bağı ve bir tarafdan yine müşterî-i mezbûr ile Mosen nâm zimmî bağı ve bir tarafdan Karacin nâm zimmî bağı ve bir tarafdan Anaştaş nâm zimmî bağı ile mahdûd olan mülk bağımı bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile altmış guruşa merkūm Andon’a bey‘ ve temlîk, ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr altmış guruşu merkūm Andon yedinden tamâmen ahz u kabz eyledim, ba‘de’l-yevm hudûd-ı mezbûr ile mahdûd olan bağ merkūm Andon’un mülk-i müşterâsı ve hakk-ı sırfı olmuşdur, mahâllinde ahz u kabz ve tasarrufa kendüyü taslît eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 12 min-Muharremü’l-haram sene 1116 Şuhûdü’l-hâl: Sandalcızâde İsmail Efendi, Emin Mehmed Efendi, Veli Efendi, el-Hâc Yusuf, Ömer Efendi, Mardıros v. Agos, Haçador v. Agob, Avanos v. Mardıros, Hokas v. Serkis.