Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 84 Hüküm no: 37 Orijinal metin no: [9a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Altıparmak Mustafa Beşe’nin küçük oğlu Mehmed’in Süleyman Beşe’de olan alacağınının, vasisi Ali Bey tarafından tahsili Vilâyet-i Anadolu’da Eğin kazâsına tâbi‘ İrnik nâm karye ahâlîsinden iken bundan akdem fevt olan Altıparmak demekle ma‘rûf Mustafa Beşe b. Mehmed nâm kimesne’nin sulbî oğlu Mehmed nâm sagīrin tesviye-i emrine ber-vech-i âtî vasî olduğunu iddi‘â eden hâfız-ı hâze’l-kitâb Ali Bey b. Veli nâm kimesne mahmiye-i İstanbul’da meclis-i şer‘de Süleyman Beşe b. Derviş nâm kimesne mahzarında üzerine da‘vâ ve takrîr-i kelâm edip müteveffâ-yı mezbûr Mustafa Beşe fevt oldukda sulbî sagīr oğlu Mehmed’in babası müteveffâ-yı mezbûrdan intikāl eden emvâlini hıfz ve ahvâlini zabt [u] rabta bin yüz on beş senesi Zilka‘desi’nin on beşinci gününde kazâ-i mezbûr kādısı olan Osman Efendi beni vasî nasb u ta‘yîn eyledikde ben dahi vesâyet-i mezbûreyi kabûl ve hizmet-i lâzımesin edâya ta‘ahhüd ve yedime ber-vech-i muharrer hüccet-i şer‘iyye vermekle hâlâ müteveffâ-yı mezbûr Mustafa Beşe’nin merkūm Süleyman Beşe zimmetinde cihet-i karz-ı şer‘îden on beş guruş hakkı olup kable’l-ahz merkūm Mustafa Beşe fevt olmağla vesâyetim hasebiyle meblağ-ı mezbûr on beş guruşu merkūm Süleyman Beşe’den hâlâ taleb ederim suâl olunsun dedikde, gıbbe’s-suâl mezbûr Süleyman Beşe cevâbında fi’l-hakīka müteveffâ-yı mezbûra cihet-i mezkûreden zimmetinde on beş guruş deyni olduğunu ikrâr lâkin müdde‘î-i mezbûr Ali Bey müteveffâ-yı mezbûrun sulbî oğlu sagīr-i mezbûr Mehmed’in kıbel-i şer‘den mansûb vasîsi olduğunu inkâr edicek, müdde‘î-i mezbûrdan müdde‘âsına muvâfık beyyine taleb olundukda udûl-i Müslimînden kazâ-i mezbûr ahâlîsinden zeyl-i hüccet-i mezkûrda isimleri mastûr olan Süleyman Bey b. Osman ve Halil Bey b. Osman nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ müteveffâ-yı mezbûr Altıparmak Mustafa Beşe b. Mehmed’in sulbî oğlu Mehmed nâm sagīrin babası müteveffâ-yı mezbûrdan intikāl eden emvâlini hıfz ve ahvâlini zabt u rabta bin yüz on beş senesi Zilka‘desi’nin on beşinci gününde kazâ-i mezbûrda kādı olan Osman Efendi işbu müdde‘î-i mezbûr Ali Bey’i bizim huzûrumuzda vasî nasb u ta‘yîn eyledikde ol dahi vesâyet-i mezbûreyi kabûl ve hizmet-i lâzımesin edâya ta‘ahhüd edip ber-vech-i muharrer yedine hüccet-i mezkûreyi vermiş idi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl [9b] ve’t-tezkiye şehâdetleri makbûle olmağın mûcebiyle müdde‘î-i mezbûr Ali Bey’in vesâyetine ba‘de’l-hükm meblağ-ı mezbûru vasiyy-i merkūma def‘ ü teslîme mezbûr Süleyman Beşe’ye tenbîh birle mâ-vaka‘a bi’t-taleb ketb olundu. Fi’l-yevmi’s-sânî aşer min-Muharremü’l-haram li-sene sitte aşere ve mi’e ve elf. Şuhûdü’l-hâl: Hüseyin Efendi b. Himmet, İsmail Efendi el-kâtib, Ömer Efendi b. Ali, Mehmed Emin Efendi kâtib.