Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 85 Hüküm no: 38 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed, Ali ve Mehmed kardeşlerin, mirastan dolayı Rabia Hatun’da olan alacaklarının tahsili Havâss-ı Refî‘a kazâsı nevâhîsinden Çekmece-i kübrâ kasabası sâkinlerinden iken bundan akdem vefât eden Mustafa Ağa b. Receb nâm kimesnenin verâseti zevce-i metrûkesi Rabia bt. Abdullah nâm hatuna ve sulbî oğlu Mehmed’e ve sulbiye kızı Rukıye’ye münhasıra olup ba‘dehû mezbûr Mehmed dahi vefât edip verâseti vâlidesi mezbûre Rabia’ya ve li-ebeveyn kız karındaşı mezbûre Rukıye’ye ve ammileri el-Hâc Ahmed ve Ali ve Mehmed ebnâ-yı Habib’e münhasıra olup ba‘dehû mezbûr Rukıye dahi vefât edip verâseti vâlidesi mezbûre Rabia ile ammileri mezbûrûn el-Hâc Ahmed ve Ali ve Mehmed’e münhasıra ve tashîh-i meseleleri bi-tarîkı’l-münâsahati’ş-şer‘iyye iki yüz on altı sehmden i‘tibâr olunup sihâm-ı mezbûreden yüz on bir sehmi mezbûre Rabia Hatun’a ve otuz beşer sehmi dahi mezbûrûn el-Hâc Ahmed ve Ali ve Mehmed’den her birine isâbet ve intikāl eylediği şer‘an zâhir ve müte‘ayyin oldukdan sonra mezbûr el-Hâc Ahmed kendi tarafından asil ve karındaşları mezbûrân Ali ve Mehmed taraflarından dahi husûs-ı âti’l-beyana vekîl olduğu nehc-i şer‘î üzere sâbit olmağla vekâleten mahmiye-i İstanbul’da meclis-i şer‘-i hatîrde tereke-i müteveffûn-ı mezbûrûna bi’l-verâse vâzı‘atü’l-yed olan mezbûre Rabia Hatun muvâcehesinde üzerine da‘vâ ve takrîr-i kelâm edip mezbûrûn Mustafa Ağa ve Mehmed ve Rukıye’den her biri fevt olduklarında kasaba-i mezbûrede vâki‘ muhallefâtlarını mezbûre Rabia Hatun kassâm-ı askerî tarafından tahrîr etdirdikde mecmû‘-ı akār ve menkūl ve esâs ve nakid ve evân-ı nühâsiye ve gayr-ı nühâsiye bahaya takvîm olunup ber-mûceb-i defter-i kassâm altmış altı bin iki yüz yirmi beş sağ akçeye bâliğ oldukdan sonra meblağ-ı mecmû‘-ı mezbûrdan ber-mûceb-i defter-i kassâm her birinin techîz ve tekfîni ve düyûnu ve resm-i âdî ve sâir masârıf-ı lâzımeleri için on dört bin dört yüz yirmi akçesi ihrâç olunmağla ber-mûceb-i defter-i kassâm bâkī kalan elli bir bin sekiz yüz beş akçeye mukavvem eşyâ-yı mezbûre Rabia Hatun yedinde olmağın hâlâ meblağ-ı mezbûrdan tashîh-i mezbûr üzere benim ile karındaşlarım müvekkilân-ı mezbûrân’a isâbet eden yirmi beş bin yüz yetmiş dokuz akçelik eşyâyı mezbûre Rabia Hatun’dan asâleten ve vekâleten taleb ederim, suâl olunsun dedikde gıbbe’s-suâl mezbûre Rabia Hatun cevâbında kazıyye müdde‘î-i mezbûrun bâlâda tafsîl etdiği vech üzere olup ber-mûceb-i defter-i kassâm ba‘de’l-masârıf hâlâ elli bir bin sekiz yüz beş akçeye mukavvem eşyâ yedinde olduğunu bi-tav‘ihî ikrâr u i‘tirâf etmekle mûcebince meblağ-ı bâkī-i mezbûr elli bir bin sekiz yüz beş akçeden müdde‘î-i mezbûr ile karındaşları müvekkilân-ı mezbûrâna [isâbet] eden yirmi beş bin yüz yetmiş dokuz sağ akçelik eşyâyı müdde‘î-i mezbûra def‘ ü teslîme mezbûre Rabia Hatun’a tenbîh birle mâ-vaka‘a bi’t-taleb ketb olundu. Fî 14 min-Muharremü’l-haram sene 1116 Şuhûdü’l-hâl: İsmail Efendi el-kâtib, Ömer Efendi el-kâtib, Veliyüddin Efendi el-kādı, Emin Mehmed Efendi el-kâtib, el-Hâc Yusuf b. Osman.