Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 86 Hüküm no: 39 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tobra bt. Sinan’ın Mîrahor mahallesindeki menzilini Viko v. Kiro’ya satması Mahmiye-i İstanbul’da Alipaşa-i atik mahâllesinde sâkine Tobra bt. Sinan nâm Nasrâniye zâtı Andon v. Yamandi ve Yovri v. Dominos nâm zimmîler ta‘rîfleriyle ba‘de’l-mu‘arrefe mahmiye-i mezbûrede meclis-i şer‘-i hatîrde işbu bâ‘isü’s-sifr Viko v. Kiro nâm zimmî muvâcehesinde bi-tav‘ihâ ikrâr ve takrîr-i kelâm edip yedimde mülküm ve hakkım olup mahmiye-i mezbûrede Mîrahor mahâllesinde vâki‘ bir tarafdan Emine Hanım mülkü ve bir tarafdan Mihal nâm zimmî mülkü ve bir tarafdan Kılıçcı Torasi mülkü ve bir tarafdan tarîk-i âm ile mahdûd ve mümtâz üç tabaka olup tabaka-i ulyâda dört bâb oda ve bir sundurma ve dehliz ve tabaka-i vüstâda üç bâb oda ve dehliz ve matbâh ve tabaka-i süflâda bir bâb oda ve bir ahır ve kenîf ve bi’r-i mâ ve havlu ve zât-ı eşcâr-ı müsmire ve gayr-ı müsmireyi müştemil menzilimi bi-cümleti’t-tevâbi‘ ve’l-levâhık mezbûr Viko’ya tarafeynden bi’l-îcâb ve’l-kabûl bey‘-i kat‘î ile dört yüz kırk guruşa bey‘ ve teslîm, ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr dört yüz guruşu mezbûr Viko’dan tamâmen ahz u kabz eyledim ba‘de’l-yevm menzil-i mahdûd-ı mezbûr merkūm Viko’nun mülk-i müşterâsıdır, keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevm 19 min-Muharremü’l-haram sene 1116. Şuhûdü’l-hâl: Es-Seyyid Abdülkerim Efendi b. es-Seyyid Hasan, Mustafa Efendi b. İbrahim, Mustafa Efendi b. İbrahim, Hüseyin Efendi b. Abdüsselam, İslâm Beşe b. Bayram, Papa Aznif v. Kasper, Mihal v. Yorgi, Manol v. Yorgi, Hüdavermiş v. Yani, Derosi v. Marat.