Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 86 Hüküm no: 40 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun’un eşi Mehmed Beşe’den muhalaa usulüyle boşanması Mahmiye-i İstanbul’da Edirnekapısı dâhilinde el-Hâc Muhyiddin mahâllesinde sâkine Afife bt. Abdünnebi nâm hatun tarafından husûs-ı ati’l-beyana vekîl olduğu zâtı ma‘rifet-i şer‘iyye ile ârifân müezzin Ebubekir Çelebi b. İbrahim ve Mehmed Ağa b. Mustafa nâm kimesneler şehâdetleriyle sâbit olan Şahin Ağa b. Ali nâm kimesne mahmiye-i mezbûrede meclis-i şer‘de müvekkile-i mezbûrenin zevc-i muhâli‘i işbu râfi‘ü’l-vesîka Mehmed Beşe b. Ali nâm kimesne mahzarında bi’l-vekâle ikrâr ve takrîr-i kelâm edip mezbûr Mehmed Beşe müvekkilem mezbûre Afife’nin zevci olup beynlerinde hüsn-i zindegâne olmamağla zimmetinde mütekarrir ve ma‘kūdün-aleyh beş bin akçe mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı dahi kendi üzerine olmak üzere zevc-i mezbûr Mehmed Beşe ile muhâla‘a-i sahîha-i şer‘iyye ile muhâla‘a olduğundan ol dahi hul‘-ı mezbûru ba‘de’l-kabûl hukūk-ı zevciyete müte‘allıka âmme-i da‘vâdan her biri âharın zimmetini ibrâ ve iskāt eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 18 min-Muharremü’l-haram sene 1116. Şuhûdü’l-hâl: Mehmed Çelebi b. Abdullah, Ali Çelebi b. Mehmed, Mustafa Çelebi b. İbrahim, Hüseyin Odabaşı b. Abdullah, Nalçacı Ahmed Çelebi.