Bab Mahkemesi 54 Numaralı Sicil (H. 1102 / M. 1691) cilt: 20, sayfa: 345 Hüküm no: 417 Orijinal metin no: [72b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülbâki b. Ahmed’in kaybolan ve Halil b. İbrahim elinde bulunan kısrağının kendisine teslimi Mahmiye-i İstanbul’da Revânî Çelebi mahallesinde sâkin Abdülbâki b. Ahmed nâm kimesne meclis-i şer‘-i şerîf-i enverde, işbu bâ‘isü’l-vesîka Halil b. İbrahim mahzarında üzerine da‘vâ ve takrîr-i kelâm edip, işbu meclis-i şer‘-i şerde mevcûd ve müşâhed mezbûr Halil yedinde olan bir re’s kır kısrak târih-i kitâbdan altı gün mukaddem mülkümden zâyi‘ olmuşidi. Hâlâ mezbûr Halil mârru’z-zikr kır kısrağa bi gayri hakkın vaz‘-ı yed eder, suâl olunup, kasr-ı yedine ve bana teslîme tenbîh olunmak matlûbumdur dedikde, gıbbe’s-suâl mezbûr Halil cevâbında, zikr olunan kısrağı târih-i kitâbdan sekiz gün mukaddem Atpazarı’nda ismi ma‘lûmum değil bir kimesneden sekiz guruş semen-i medfû‘a iştirâ ve kabz edip, mülk-i müşterâm olmağla vaz‘-ı yed ederim, mezbûrun mülkü olduğu ma‘lûmum değildir deyücek, müdde‘î-i mezbûrdan müdde‘âsına beyyine taleb olundukda, udûl-i müslimînden olup mahalle-i mezbûre sükkânından Ali b. Abdullah ve Mehmed b. Yusuf nâm kimesneler li ecli’ş-şehâde meclis-i şer‘a hâzırân olup, istişhâd olunduklarında, fi’l-hakīka işbu meclis-i şer‘de mevcûd ve müşâhed merkūm Halil yedinde olan kır kısrak müdde‘î-i mezbûrun mülkü ve hakkı olup, târih-i kitâbdan altı gün mukaddem mülkünden zâyi‘ olmuşidi. Biz bu husûsa bu vech üzre şâhidleriz, şehâdet dahi ederiz deyu her biri edâ-yı şehâdet-i şer‘iyye ettiklerinde, gıbbe’t-ta‘dîl ve’t-tezkiye şehâdetleri makbûle olup, müdde‘î-i mezbûr tahlîf-i şer‘î ile tahlîf olundukdan sonra mûcebince zikr olunan kısrağı müdde‘î-i mezbûra red ve teslîme mezbûr Halil’e ba‘de’t-tenbîh, mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, Mahmud b. Hasan, Ali b. Bâli, Mehmed b. İdris, Ahmed b. Ahmed, Mustafa b. Şaban.