Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 87 Hüküm no: 41 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim, Ebubekir, Hatice ve Zamane isimli küçük çocukların parasından borç alan Sahak’ın borcunu ödemesi Mahmiye-i İstanbul’da Sekbânbaşı Yakub Ağa mahâllesinde sâkin İbrahim ve Ebubekir ve Hadîce ve Zamane evlâd-ı Süleyman nâm sagīrin tesviye-i emrlerine kıbel-i şer‘den mansûb vasîleri olan işbu bâ‘isü’l-kitâb İbrahim b. Veli nâm kimesne mahmiye-i mezbûrede meclis-i şer‘-i hatîrde Sahak v. Banos nâm zimmî muvâcehesinde bi’l-vesâye üzerine da‘vâ ve takrîr-i kelâm edip mezbûr Sahak’a bundan akdem yedimde olan sıgār-ı mezbûrûnun mallarından yüz guruş idâne ve teslîm ol dahi istidâne ve kabz ü tesellüm eylediğinden sonra meblağ-ı mezbûr zimmetinde sıgār-ı mezbûrûna vâcibü’l-edâ deyni olduğunu Mahmudpaşa Mahkemesi’nde nâibü’ş-şer‘ olan Sunullah Efendi huzûrunda ikrâr ve yedime bir kıt‘a hüccet dahi verdiğinden sonra meblağ-ı mezbûrun on iki buçuk guruşunu mezbûr Sahak bana edâ ve teslîm etmekle seksen yedi buçuk guruş zimmetinde kalmışdır. Hâlâ mezbûr Sahak’a suâl olunup meblağ-ı bâkī-i mezbûr seksen yedi buçuk guruşu sıgār-ı mezbûrûn için bana edâ ve teslîme tenbîh olunmak matlûbumdur dedikde, gıbbe’s-suâl mezbûr Sahak cevâbında ber-mûceb-i hüccet-i mezkûre vasiyy-i mezbûr yedinde olan sıgār-ı mezbûrûnun mallarından yüz guruş istidâne ve kabz eylediğini ikrâr lâkin meblağ-ı mezbûrdan vasiyy-i mezbûra bi’d-defa‘ât kırk beş guruş edâ ve teslîm ol dahi ahz u kabz edip ancak zimmetimde elli beş guruş deynim kalmışdır deyüp, müdde‘î-i mezbûru ba‘zı müdde‘âsında def‘le mukābele edicek gıbbe’l-istintâk ve’l-inkâr merkūm Sahak’dan ber-vech-i muharrer def‘-i mezbûruna beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka merkūm Sahak’dan kabzını i‘tirâf eylediği meblağ-ı mezbûr on iki buçuk guruşdan ziyâde otuz iki buçuk guruş dahi ahz u kabz etmediğine vasiyy-i mezbûra yemîn teklîf olundukda ol dahi alâ-vefkı’l-mesûl yemîn billâhi’l-aliyyi’l-a‘lâ etmeğin mûcebince vasiyy-i mezbûrun kabzını i‘tirâf eylediği on iki buçuk guruşdan bâkī kalan meblağ-ı mezbûr seksen yedi buçuk guruşu sıgār-ı mezbûrûn için vasiyy-i mezbûra edâ ve teslîme mezbûr Sahak’a tenbîh birle mâ-vaka‘a bi’t-taleb ketb olundu. Fi’l-yevm 18 min-Muharremü’l-haram sene 1116 Şuhûdü’l-hâl: İsmail Efendi kâtib, Emin Mehmed Efendi kādî, Veliyüddin Efendi kādî, el-Hâc Yusuf muhzır.