Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 88 Hüküm no: 42 Orijinal metin no: [10a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çelebi’nin, Yamandi v. Yorgi aleyhindeki alacak davasının reddedilmesi Mahmiye-i İstanbul’da Kâtibmuslihiddin mahâllesinde sâkin Abdullah Çelebi b. İsmail nâm kimesne mahmiye-i mezbûrede meclis-i şer‘-i hatîrde işbu bâ‘isü’s-sifr Yamandi v. Yorgi nâm zimmî muvâcehesinde üzerine da‘vâ ve takrîr-i kelâm edip mezbûr Yamandi zimmetinde cihet-i karz-ı şer‘îden yüz guruş hakkım olmağla hâlâ meblağ-ı mezbûru mezbûr Yamandi’den taleb ederim, suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka cihet-i mezbûreden meblağ-ı mezbûr yüz guruş müdde‘î-i mezbûra zimmetinde deyni olmadığına mezbûr Yamandi’ye yemîn teklîf olundukda ol dahi alâ vefkı’l-mesûl yemîn billâhi ellezî enzele’l-İncîle alâ-İsa -aleyhi’s-selâm- etmeğin mûcebince müdde‘î-i mezbûr bilâ-beyyine bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-hâmis aşer min-Muharremü’l-haram li-sene sitte aşere ve mi’e ve elf. Şuhûdü’l-hâl: Hamid Beşe mumcu, Musa Çelebi mumcu, İbrahim Beşe b. Abdullah, Yusuf Çelebi b. Abdullah, el-Hâc Yusuf b. Osman.