Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 88 Hüküm no: 43 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sema bt. Kiragoş’un, kızı Gevher için boşandığı eşi Agob aleyhindeki nafaka davasının sulh ile neticelenmesi Mahmiye-i İstanbul’da Balat kapısı dâhilinde sâkine Sema bt. Kiragoş nâm Nasrâniye tarafından husûs-ı âti’l-beyana vekîl olduğu zâtını ma‘rifet-i şer‘iyye ile ârifân Mıgırdıç v. Ariton ve Haçador v. Safer nâm zimmîler şehâdetleri ile şer‘an sâbit ve sübût-ı vekâletine hükm-i şer‘î lâhık olan Bogos v. Serkiz nâm mahmiye-i mezbûrede meclis-i şer‘de müvekkile-i mezbûrenin zevc-i sâbıkı Agob v. Kiragos nâm Ermeni muvâcehesinde bi’l-vekâle ikrâr ve takrîr-i kelâm edip mezbûr Agob’un firâşından hâsıl ve müvekkilem mezbûreden mütevellid olup bi-hakkı’l-hıdâne hacr ü terbiyesinde olan kızı Gevher nâm sagīrenin bundan akdem yedinde olan işbu nafaka-i mefrûza hücceti nâtık olduğu üzere mezbûr Agob zimmetinde müctemi‘ altmış üç guruş nafakayı bi’l-vekâle mezbûr Agob’dan taleb ve da‘vâ eylediğimde beynimizde ba‘de’l-münâza‘a tavassut-ı muslihîn ile meblağ-ı mezbûr da‘vâsından beni bi’l-vekâle otuz buçuk guruş üzerine akd-i musâlaha eylediklerinden ben dahi sulh-ı mezbûru ba‘de’l-kabûl bedel-i sulh olan meblağ-ı mezbûru mezbûr Agob âcilen edâya iktidârı olmamak ile tecîle tâlib olmağın târîh-i kitâbdan altmış bir gün tamâmına değin edâ etmek üzere merkūm zimmîyi tecîl eyledim. Min-ba‘d mâ‘adâ meblağ-ı mezbûra müte‘allıka âmme-i da‘vâdan bi’l-vekâle merkūm Agob’un zimmetini ibrâ ve iskāt eyledim, meblağ-ı müeccel-i mezbûrdan gayrı vechen mine’l-vücûh da‘vâ ve nizâ‘ım kalmamışdır dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 18 min-Muharremü’l-haram sene 1116. Şuhûdü’l-hâl: Hüseyin Ağa el-mübâşir, Abdülbaki b. Mahmud, Muslı b. Ömer, Mehmed b. Mehmed, Ömer Efendi b. Ali, Mehmed Emin Efendi kâtib, Ali b. Mahmud, el-Hâc Yusuf b. Osman.