Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 89 Hüküm no: 44 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hüseyin’in, Mustafa Sipahi’de olan alacağının tahsili Mahmiye-i İstanbul’da Karagümrük kurbünde Hadîce Hatun mahâllesinde sâkin işbu bâ‘isü’l-kitâb el-Hâc Mehmed b. Hüseyin nâm kimesne mahmiye-i mezbûrede meclis-i şer‘-i enverde Mustafa Sipâhî b. Mehmed mahzarında üzerine da‘vâ ve takrîr-i kelâm edip işbu yedimde olan temessük nâtık olduğu üzere cihet-i deyn-i şer‘îden ba‘de-külli’l-hesâb mezbûr Mustafa Sipâhî zimmetinde altmış esedî guruş hakkım olmağla hâlâ taleb eylediğimde, edâdan imtinâ‘ eder. Suâl olunsun dedikde, gıbbe’s-suâl mezbûr Mustafa Sipâhî cevâbında fi’l-hakīka temessük mûcebince cihet-i deyn-i şer‘îden ba‘de-külli’l-hesâb zimmetinde müdde‘î-i mezbûra altmış esedî guruş deyni olduğunu ikrâr etmeğin ikrârı mûcebince meblağ-ı mezbûr altmış esedî guruşu müdde‘î-i mezbûr el-Hâc Mehmed’e edâ ve teslîme mezbûr Mustafa Sipâhî’ye tenbîh birle mâ-vaka‘a bi’t-taleb ketb olundu. Fi’l-yevmi’l-ışrîn min-Muharremü’l-haram sene 1116. Şuhûdü’l-hâl: Hüseyin Efendi b. Himmet, İsmail Efendi el-kādı, Ömer Efendi el-kādı, Yusuf Çelebi b. Abdullah, Veliyüddin Efendi el-kādı, Mehmed Emin Efendi el-kādı, el-Hâc Yusuf b. Osman