Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 89 Hüküm no: 45 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Tarandafil’in bağını Nikola v. Dimitri’ye satması Vilâyet-i Rumeli’nde Kerpiniş kazâsı ahâlîsinden Nikola v. Tarandafil nâm zimmî mahmiye-i İstanbul’da meclis-i şer‘de işbu râfi‘ü’s-sifr Nikola v. Dimitri nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülküm olup kazâ-i mezbûra tâbi‘ Koriş nâm karyede vâki‘ iki tarafdan Komnaki Belho nâm zimmî bağı ve bir tarafdan tarîk-i âm ile mahdûd bir dönüm mülk bağımı tarafeynden îcâb ve kabûlü hâvî bey‘-i kat‘î ile mezbûr Nikola’ya elli guruşa bey‘ ve temlîk ol dahi iştirâ ve temellük ve kabûl eyledikden sonra semeni olan meblağ-ı mezbûru yedinden tamâmen ahz u kabz eyledim. Ba‘de’l-yevm zikr olunan bağ mezbûr Nikola’nın mülk-i müşterâsı olmuşdur, mahâllinde kabza taslît eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Muharremü’l-haram li-sene sitte aşere ve mi’e ve elf. Şuhûdü’l-hâl: el-Hâc Mehmed Efendi b. Ahmed, İsmail Efendi kâtib, Süleyman Ağa za‘îm, el-Hâc Mustafa b. Hasan, Yani v. Yorgi, Dimitri v. Tanaş, Tanaş v. Yani, Yani v. Yorgi, Nikola v. Komno, Dimitri v. Rendo, Dimitri v. Tanaş.