Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 90 Hüküm no: 46 Orijinal metin no: [10b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arakil v. Agob’un tarlasını Mehmed b. Ali’ye satması Vilâyet-i Anadolu’da Divriği kazâsına tâbi‘ Zimara nâm karye ahâlîsinden olup mahmiye-i İstanbul’da Kuyu Fırını’nda sâkin hayyât tâifesinden Arakil v. Agob nâm zimmî mahmiye-i mezbûrede meclis-i şer‘-işerîfde Teberdâr-ı şehriyârî işbu bâ‘isü’l-kitâb Mehmed Bey b. Ali mahzarında ikrâr ve takrîr-i kelâm edip ferâğ-ı âtî sudûruna değin taht-ı tasarrufumda olup kazâ-i mezbûra tâbi‘ Bekreton? nâm karye toprağında vâki‘ iki tarafdan Adımoğulları tarlası ve bir tarafdan Gülsüzoğulları tarlası ve bir tarafdan Çöpoğulları ta[rla]sıyla mahdûd ve mümtâz beş keyl tohum isti‘âb eder tarlamı mezbûr Mehmed Bey’e kırk beş guruş [11a] bedel mukābelesinde ma‘rifet-i sâhib-i arz ile ferâğ ve tefvîz ol dahi ber-vech-i muharrer tefevvüz ve kabûl eylediğinden sonra bedel-i merkūm kırk beş guruşu mezbûr Mehmed Bey yedinden tamâmen ahz u kabz eyledim ba‘de’l-yevm zikr olunan tarla mezbûr Mehmed Bey’in mülk-i müfevvezi olup mahâllinde zabt ve tasarrufa mezbûru taslît eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdi ve’l-ışrîn min-Muharremü’l-haram li-sene sitte aşere ve mi’e ve elf. Şuhûdü’l-hâl: Ali Beşe b. Mehmed, İbrahim Beşe b. Mehmed, Kanber b. Pîr Sultân, Bayram Beşe b. Mahmud.