Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 90 Hüküm no: 47 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çelebi ve kardeşlerinin, Tüccar Jozef, Kostantin ve Mahmud ile sulh olması Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i mergūbdan irsâl olunan Mevlânâ Sandalcızâde İsmail Efendi mahrûse-i Galata’ya tâbi‘ Tophane iskelesinde merbûta zikri âtî şayka ta‘bîr olunur sefîneye varıp zeyl-i vesîkada mastûrü’l-esâmi Müslimîn huzûrlarında akd-i meclis-i şer‘-i Nebevî etdikde vilâyet-i Anadolu’da Giresun kazâsı ahâlîsinden olup mahmiye-i İstanbul’da Ayazma Kapısı dâhilinde müsâfiren sâkin kendi tarafından asil ve li-ebeveyn er karındaşları olup kazâ-i mezbûr sâkinlerinden es-Seyyid Mehmed Ağa ve es-Seyyid Hasan Ağa ibney es-Seyyid Ömer b. es-Seyyid Ahmed nâm kimesneler taraflarından husûs-ı âti’l-beyana vekîl olduğu kazâ-i mezbûr ahâlîsinden es-Seyyid el-Hâc Hüseyin b. es-Seyyid Siyami ve es-Seyyid Osman b. es-Seyyid Süleyman nâm kimesneler şehâdetleriyle mahzar-ı hasm-ı şer‘îde şer‘an sâbit ve sübût-ı vekâletine hükm-i şer‘î lâhık olan es-Seyyid Süleyman Çelebi nâm kimesne meclis-i ma‘kūd-ı mezbûrda fi’l-asl kazâ-i mezbûr sâkinlerinden es-Seyyid Mahmud b. es-Seyyid Ahmed nâm kimesne mahzarında bi’l-asâle ve bi’l-vekâle ikrâr-ı tam ve takrîr-i kelâm edip işbu mu‘âyene ve müşâhede olunan şayka ta‘bîr olunur on dokuz zirâ‘ sefînenin nısfı benim ile karındaşlarım müvekkilân-ı mezbûrânın mülk ve hakkı olup ve nısf-ı âharı dahi mezbûr es-Seyyid Mahmud’un mülkü olmağla mezkûr es-Seyyid Mahmud sefîne-i mezkûrede reis olmağın târîh-i kitâbdan altı ay mukaddem sefîne-i mezbûreyi bi’l-cümle hissemiz ile kendinin mülkü olmak üzere işbu hâzır bi’l-meclis Franç”e tüccârından Jozef v. Markiz nâm müste’men ile Kostantin v. Dimitri nâm zimmîye fuzûlî ber-vech-i iştirâk bin iki yüz yetmiş guruş semen-i medfû‘a ve makbûza [bey‘] ve teslîm onlar dahi ba‘de’l-iştirâ ve’t-tesellüm ben dahi asâlet ve vekâletim hasebiyle sefîne-i mezkûrede olan nısf hissemizi bi’l-istihkāk mezbûrân Jozef ve Kostantin’den taleb ve da‘vâ ve müdde‘âmı isbât sadedinde olduğumuzda beynimizde münâza‘ât-ı kesîre vâkı‘a olmuş idi. El-hâletü hâzihi mezbûr es-Seyyid Mahmud mezbûrân Jozef ve Kostantin muvâcehelerinde bi’l-istihkāk müdde‘âmı isbât mukarrer olduğuna binâen bey‘-i mezkûrunu tecvîz etmek üzere alâ tarîkı’s-sulh bana iki yüz elli guruş def‘ ve teslîm ben dahi yedinden ba‘de’l-ahz ve’l-kabz sefîne-i mezkûrede bi’l-asâle ve bi’l-vekâle müdde‘âm olan nısf hisse-i mezkûru mezbûrân Jozef ve Kostantin’e mezbûr es-Seyyid Mahmud’un bey‘-i mezkûrunu tecvîz edip husûs-ı mezbûra müte‘allıka âmme-i de‘âvî ve mutâlebâtdan mezbûr es-Seyyid Mahmud’un ve merkūmân Jozef ve Kostantin’in zimmetlerini ibrâ ve iskāt eyledim, ol dahi ber-vech-i muharrer bana medfû‘u olan meblağ-ı mezkûra ve gayra müte‘allıka âmme-i de‘âvî ve mutâlebâtdan benim ve karındaşlarım müvekkilân-ı mezbûrânın zimmetlerini ibrâ ve iskāt eyledi. Min-ba‘d zikr olunan sefînede benim ve karındaşlarım müvekkilân-ı mezbûrânın alâka ve medhalleri kalmadı, mezbûrân Jozef ve Kostantin’in mülk-i müşterâları olup husûs-ı mezkûra müte‘allıka asâleten ve vekâleten vechen mine’l-vücûh ve sebeben mine’l-esbâb aslâ da‘vâ ve nizâ‘ım yokdur dedikde, gıbbe’t-tasdîki’ş-şer‘î vâki‘ hâli mevlânâ-yı mezbûr mahâllinde tahrîr, ba‘dehû ma‘an ba‘s olunan Mehmed Bey b. Mehmed ve Ali b. Ahmed ile meclis-i şer‘e gelip alâ-vukū‘ihî inhâ ve i‘lâm etmeğin mâ-vaka‘a bi’t-taleb ketb olundu. Fi’l-yevmi’l-ışrîn min-Muharremü’l-haram sene sitte aşere ve mi’e ve elf. Şuhûdü’l-hâl: el-Hâc Mustafa b. el-Hâc Mehmed, el-Hâc Ahmed b. Ali, Kayıkçı el-Hâc Mehmed b. Ali, İsmail Ağa b. Abdullah, es-Seyyid el-Hâc Fazlullah b. es-Seyyid Mehmed, el-Hâc Mehmed b. el-Hâc Ömer, el-Hâc Hüseyin b. Hasan, es-Seyyid Ahmed b. es-Seyyid Mehmed, Hüseyin Çavuş b. Ali, el-Hâc Veli b. Ali, el-Hâc Ali b. Yusuf, Zülfikar b. Abdullah, Osman b. Mustafa, Hüseyin Reis b. Ahmed, es-Seyyid Ahmed b. Mustafa, es-Seyyid Mustafa b. Ahmed, Ali Beşe b. Hasan, Mehmed b. Abdullah.