Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 92 Hüküm no: 48 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Osman’ın varisleri Ayşe ve Fatıma’ya intikal eden köle Gevher Tac’ı azat etmeleri Mahmiye-i İstanbul’da Ahırkapı kurbünde Akbıyık mahâllesinde sâkin bundan akdem fevt olan Osman b. Mustafa nâm kimesne verâseti zevce-i metrûkesi Âişe bt. Mehmed nâm hatun ile sulbiye kebîre kızı Fâtıma’ya münhasıra olduğu müte‘ayyin oldukdan sonra rıkk-ı sâbıkını mu‘terife işbu açık kaşlı gök elâ gözlü uzun boylu Rusiyyetü’l-asl Gevher Taç bt. Abdullah nâm câriye mahmiye-i mezbûrede meclis-i şer‘de mezbûretân Âişe ve Fâtıma mahzarlarında üzerlerine da‘vâ ve takrîr-i kelâm edip ben müteveffâ-yı mezbûrun câriye-i memlûkesi olup ba‘de-vefâtihî veresesi mezbûretân Âişe ve Fâtıma’ya intikāl eyledikden sonra târîh-i kitâbdan bir ay mukaddem mezbûretân Âişe ve Fâtıma beni âzâd edip harâir-i asliyât zümresine ilhâk ve idrâc etmişler iken yine rıkk olmak üzere vaz‘-ı yed ederler. Suâl olunup kasr-ı yedlerine ve sebîlem tahliye olunması murâdımdır dedikde gıbbe’s-suâl mezbûretân Âişe ve Fâtıma cevâblarında fi’l-hakīka kazıyye merkūme Gevher Tac’ın bâlâda iddi‘â eylediği minvâl üzere olup târîh-i merkūmede mezbûre Gevher Tac’ı âzâd ettiklerini ikrâr u i‘tirâf eylediklerinde mûcebiyle merkūme Gevher Tac’ın ıtkına birle mâ-vaka‘a bi’t-taleb ketb olundu. Fi’l-yevmi’l-ışrîn min-Muharremü’l-haram li-sene aşere ve mi’e ve elf. Şuhûdü’l-hâl: Mustafa Beşe b. İbrahim el-mübâşir, Mehmed b. Abdullah, Musa b. Ali, Ahmed b. Receb, el-Hâc Yusuf b. Osman, Yusuf Çelebi b. Abdullah, Ali b. Abdi, Baba Mustafa b. ( ).