Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 92 Hüküm no: 49 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülbaki b. Mustafa’nın Şamlı köyündeki menzillerini Süleyman b. Ahmed’e rehin vermesi Havâss-ı refî‘a kazâsı nevâhîsinden Terkos nâhiyesine tâbi‘ Şamlı nâm karye ahâlîsinden Abdülbaki b. Mustafa nâm kimesne mahmiye-i İstanbul’da meclis-i şer‘de işbu râfi‘ü’l-vesîka Süleyman b. Ahmed nâm kimesne mahzarında ikrâr ve takrîr-i kelâm edip mezbûr Süleyman Ağa malından bana yetmiş guruş ikrâz ve teslîm ben dahi yedinden iktirâz ve kabz ve masârıfıma sarfla ba‘de’l-istihlâk zimmetimde deynim olmağla meblağ-ı mezbûr mukābelesinde karye-i mezbûrede vâki‘ yedimde mülküm olup bir tarafdan Safiye bt. Osman ve üç tarafdan tarîk-i âm ile mahdûd bir bâb tahtânî odayı müştemil menzil ile kezâlik karye-i mezbûrede vâki‘ mülküm olup menzil-i mezkûra muttasıl bir tarafdan yine mezbûre Safiye mülkü ve üç tarafdan tarîk-i âm ile mahdûd fevkānî iki bâb odayı ve ahırı ve havluyu müştemil menzillerimi mezbûr Süleyman Ağa’ya ba‘de’t-tahliye rehn ü teslîm, ol dahi irtihân ve tesellüm eyledi dedikde gıbbe’t-tasdîki’ş-şer‘î mezbûr Abdülbaki Beşe’nin li-ebeveyn er karındaşı Mehmed Beşe nâm kimesne mezbûr Süleyman Ağa mahzarında ikrâr ve takrîr-i kelâm edip karındaşım mezbûr Abdülbaki Beşe zimmetinde mezbûr Süleyman Ağa’ya deyni olan meblağ-ı mezbûr yetmiş guruşa tarafeynden emr u kabûlü hâvî kefâlet-i sahîha ile kefil ve zâmin oldum dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 22 min-Muharremü’l-haram sene 1116. Şuhûdü’l-hâl: İbrahim Çelebi b. Ahmed, Müezzin Ahmed Çelebi b. Hüseyin, Berber Ahmed Beşe b. Abdullah, Receb Beşe b. Mustafa, el-Hâc Yusuf b. Osman.