Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 94 Hüküm no: 51 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Minas ve Bağdasar kardeşlerin Aleksan v. Aznavur aleyhindeki menzil davasında sulh olmaları Medîne-i Üsküdar’da Pazarbaşı mahâllesinden Minas ve Bağdasar veledey Sahak nâm zimmîler mahmiye-i İstanbul’da meclis-i şer‘de bâ‘isü’s-sifr Aleksan v. Aznavur nâm zimmî muvâcehesinde ikrâr ve takrîr-i kelâm edip mahâlle-i mezbûrede vâki‘ iki tarafdan Hayreddin Çavuş Vakfı ve bir tarafdan el-Hâc İbrahim bağı ve taraf-ı râbii tarîk-i hâs ile mahdûd menzilimi bi-gayrı hakkın zabt eder deyü merkūm Aleksan’dan taleb ve da‘vâ eylediğimde ol dahi menzil-i mahdûd-ı mezbûru gāib ani’l-meclis Ebubekir b. Ali nâm kimesne tarafından vekâleten yüz yirmi guruşa bana bey‘ ve teslîm ben dahi ber-vech-i muharrer iştirâ ve tesellüm ve bu vech üzere vaz‘-ı yed ederim deyü beynimizde nizâ‘-ı küllî vukū‘undan sonra el-hâletü hâzihi da‘vâ-i mezkûremden beni merkūm Aleksan on guruş üzerine akd-i musâlaha eyledikde ben dahi sulh-ı mezbûru ba‘de’l-kabûl bedel-i sulh olan meblağ-ı mezbûru merkūm Aleksan yedinden alıp kabz edip husûs-ı mezkûra müte‘allıka da‘vâdan merkūm Aleksan’ı ibrâ ve iskāt eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Muharremü’l-haram li-sene sitte aşere ve mi’e ve elf. Şuhûdü’l-hâl: Molla Ali b. Ebubekir, Abdullah Efendi b. Yahya, el-Hâc Mustafa b. Mehmed, Hasan b. Hüseyin.