Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 94 Hüküm no: 52 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Mehmed’in, duhan dönümü ölçme iltizamından dolayı Hüseyin Ağa’daki alacağının tahsili Mahmiye-i İstanbul’da Mimarsinan mahâllesinde sâkin işbu râfi‘ü’l-vesîka Ali b. Mehmed nâm kimesne mahmiye-i mezbûrede meclis-i şer‘-i hatîr-i lâzımü’t-tevkīrde el-Hâc Hüseyin Ağa b. ( ) mahzarında üzerine da‘vâ ve takrîr-i kelâm edip bin yüz on dört senesine mahsûb olmak üzere Selanik sancağında vâki‘ Karaferye kazâsının duhân dönümü misâhası mezbûr el-Hâc Hüseyin Ağa’nın uhdesinde olmağla mezbûr el-Hâc Hüseyin Ağa dahi zikr olunan duhân dönümü misâhasını sene-i mezbûreye mahsûb olmak üzere beş yüz guruşa bana ilzâm, ben dahi iltizâm ve kabûl edip meblağ-ı mezbûru merkūm el-Hâc Hüseyin Ağa’ya ber-vech-i peşin def‘ ü teslîm ol dahi ahz u kabz ve yedime temessük verdiğinden sonra zikr olunan duhân dönümü misâhasının zabtı mümkün olmamağla hâlâ mezbûr el-Hâc Hüseyin Ağa’ya suâl olunup ber-vech-i muharrer kendüye medfû‘um olan meblağ-ı mezbûr beş yüz guruşu bana redd ü teslîme tenbîh olunmak matlûbumdur dedikde gıbbe’s-suâl el-Hâc Hüseyin Ağa cevâbında fi’l-hakīka kazıyye müdde‘î-i mezbûrun bâlâda tafsîl etdiği vech üzere olup zikr olunan duhân dönümü misâhası için müdde‘î-i mezbûrdan meblağ-ı mezbûr beş yüz guruşu ahz u kabz edip ve zikr olunan duhân dönümü misâhasını müdde‘î-i mezbûr zabt etmediğini bi-tav‘ihî ikrâr u i‘tirâf etmeğin mûcebince meblağ-ı mezbûr beş yüz guruşu müdde‘î-i mezbûra redd ü teslîme mezbûr el-Hâc Hüseyin Ağa’ya tenbîh birle mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Muharremü’l-haram li-sene sitte aşere ve mi’e ve elf. Şuhûdü’l-hâl: el-Hâc Mehmed Efendi el-kādı, İsmail Efendi el-kādı, Ömer Efendi el-kâtib, Emin Mehmed Efendi el-kâtib, el-Hâc Yusuf el-muhzır.